کاٹھمنڈو، 12 اپریل (ہ س)۔ نیپال کے وزیر اعظم بالیندر شاہ کو ہندوستان کے دورے کی دعوت ملی ہے۔ وزیر خارجہ ششیر کھنال کے مطابق، ہندوستان کے وزیر اعظم نریندر مودی کی دعوت کو شاہ نے قبول کر لیا ہے۔ بحر ہند کانفرنس میں شرکت کے لیے اس وقت ماریشس میں موجود وزیر خارجہ کھنال اور ہندوستان کے وزیر خارجہ ڈاکٹر ایس جے شنکر کے درمیان ہوئی سائیڈ لائن ملاقات میں بھی شاہ کے ہونے والے دورہ ہندوستان پر تبادلہ خیال کیا گیا۔

ماریشس سے نیپال کے وزیر خارجہ کھنال نے فون پر بتایا کہ ہندوستان کے وزیر اعظم مودی نے شاہ کو بھیجے گئے تہنیتی پیغام میں ہندوستان کے دورے پر آنے کی دعوت دی ہے۔ نیپال حکومت نے اسے قبول کر لیا ہے لیکن دورے کی تاریخ ابھی طے نہیں ہوئی ہے۔

اس وقت دونوں ممالک کی وزارت خارجہ بالیندر شاہ کے دورے کے حوالے سے تیاریاں کر رہی ہیں۔ نیپال کے خارجہ سکریٹری امرت رائے نے کہا کہ ہندوستان اور نیپال حکومت کے درمیان دورے کے ایجنڈے پر بات چیت جاری ہے۔ ہندوستان کی وزارت خارجہ اور کاٹھمنڈو میں واقع ہندوستانی سفارت خانے کے حکام کے ساتھ مسلسل میٹنگیں کر کے دورے کے دوران ہونے والے معاہدوں پر اتفاق رائے پیدا کرنے کی کوشش کی جا رہی ہے۔

ہندوستھان سماچار

---------------

ہندوستان سماچار / انظر حسن