نئی دہلی، 11 اپریل (ہ س) پولیس نے شمال مشرقی دہلی کے ویلکم تھانہ علاقے میں ایک نوجوان کے قتل کا معاملہ حل کر لیا ہے اور ایک نابالغ سمیت تین ملزمان کو گرفتار کر لیا ہے۔ متوفی کی شناخت محمد شمیم (21) کے طور پر ہوئی ہے جو لکڑی مارکیٹ، ویلکم ایریا کا رہائشی تھا۔
ایک سینئر پولیس افسر نے ہفتہ کو بتایا کہ 10 اپریل کی شام تقریباً 6:45 بجے جھیل پارک میں ایک مزار کے قریب ایک لاش پڑی ہونے کی اطلاع ملی۔ اطلاع ملتے ہی دہلی پولیس کی ایک ٹیم جائے وقوعہ پر پہنچی اور ایک نوجوان کی لاش کو برآمد کیا۔ تفتیش کے دوران مقتول کی شناخت محمد شمیم کے نام سے ہوئی ہے۔ اس کے بعد ایک فرانزک ٹیم کو جائے وقوعہ سے اہم شواہد اکٹھے کرنے کے لیے بلایا گیا، اور لاش کو پوسٹ مارٹم کے لیے گرو تیگ بہادر اسپتال بھیج دیا گیا۔
تعزیرات ہند کی دفعہ 103(1) کے تحت ویلکم پولیس اسٹیشن میں ایک کیس درج کیا گیا، اور تحقیقات شروع کی گئی۔ اسٹیشن ہاو¿س آفیسر انسپکٹر روپیش کھتری کی قیادت میں ایک خصوصی تحقیقاتی ٹیم تشکیل دی گئی۔ تکنیکی اور مقامی ذرائع کا استعمال کرتے ہوئے، پولیس ٹیم نے کیس کی تفتیش کی اور تین ملزمان کو گرفتار کیا: وسیم عرف میاں (20)، تلک راج عرف راج (23)، اور ایک 17 سالہ نابالغ۔ تمام ملزمان ویلکم ایریا کے رہائشی ہیں۔
دوران تفتیش ملزم نے قتل کا اعتراف کر لیا۔ ان کا کہنا تھا کہ مقتول شمیم عرف سوئی انہیں اکثر تنگ کرتا تھا اور دھمکیاں دیتا تھا۔ جس سے تنگ آکر انہوں نے شمیم پر حملہ کردیا جس کے نتیجے میں وہ جاں بحق ہوگیا۔ ملزمان ارتکاب جرم کے بعد موقع سے فرار ہوگئے۔ پولیس کے مطابق قتل میں استعمال ہونے والا اسلحہ برآمد کرنے کی کوششیں جاری ہیں۔ واقعے کے دیگر پہلوو¿ں سے پردہ اٹھانے کے لیے مزید تفتیش جاری ہے۔
---------------
ہندوستان سماچار / عبدالسلام صدیقی
