منوہر لال نے بھوٹان میں پونا تسانگ چھو ہائیڈرو الیکٹرک پروجیکٹ کا دورہ کیا

نئی دہلی، 10 اپریل (ہ س)۔ بجلی، ہاوسنگ اور شہری امور کے مرکزی وزیر منوہر لال نے جمعہ کو اپنے سرکاری دورے کے دوسرے دن بھوٹان میں پونا تسانگ چھو-I اور پونا تسانگ چھو-II ہائیڈرو الیکٹرک پروجیکٹ کے مقامات کا دورہ کیا۔ اس کے علاوہ انہوں نے وانگڈو فوڈرنگ ڈزونگ کا بھی دورہ کیا، جو بھوٹان کے بھرپور تاریخی اور ثقافتی ورثے کا مرکز ہے۔

مرکزی وزیر برائے بجلی منوہر لال نے ڈیم کی تعمیر کے لیے پونا تسانگ چھو-I پروجیکٹ سائٹ پر کنکریٹ ڈالنے کی تقریب میں شرکت کی۔ دونوں ممالک کے درمیان سب سے بڑے مشترکہ ہائیڈرو الیکٹرک پروجیکٹ کی تکمیل سے بھوٹان کی بجلی پیدا کرنے کی صلاحیت میں نمایاں اضافے کی توقع ہے۔ اس دورے کے دوران منوہر لال نے توانائی کے شعبے میں طویل مدتی شراکت داری پر زور دیتے ہوئے ہندوستان کی مالی امداد اور تکنیکی تعاون سمیت مسلسل تعاون کے بارے میں بتایا۔ انہوں نے منصوبے کو محفوظ اور موثر طریقے سے آگے بڑھانے میں دونوں فریقوں کے انجینئروں اور ماہرین کی مربوط کوششوں کو سراہا۔

انہوں نے پاور پلانٹ کا معائنہ بھی کیا اور منصوبے پر عمل درآمد کی صورتحال اور اہم کامیابیوں کے بارے میں معلومات حاصل کیں۔ اس کے بعد منوہر لال نے پونا تسانگ چھو-II منصوبے کا دورہ کیا۔ اس دورے میں پاور پلانٹ اور ڈیم سائٹ کا معائنہ بھی شامل تھا، جہاں انہیں جاری کاموں کے بارے میں بریفنگ دی گئی۔ مرکزی وزیر نے منصوبے کی آپریشنل کارکردگی کا جائزہ لیا اور بتایا کہ اس سے پہلے ہی خاطر خواہ بجلی اور ریونیو پیدا ہو چکا ہے، ساتھ ہی ہندوستان کو ماحول دوست توانائی کی برآمد بھی ممکن ہو رہی ہے۔ انہوں نے منصوبے کے کامیاب نفاذ اور آپریشنل کارکردگی کی تعریف کی، بھوٹان کی اقتصادی ترقی میں اس کے تعاون کو تسلیم کیا اور پائیدار توانائی کی ترقی میں بھوٹان کے ساتھ تعاون کے لیے ہندوستان کے مسلسل عزم کا اعادہ کیا۔

ہندوستھان سماچار

---------------

ہندوستان سماچار / انظر حسن