نیپال: نمائندگان اسمبلی کے انتخابات کے لیے ووٹوں کی گنتی جاری، ابتدائی رجحانات میں راشٹریہ سوتنتر پارٹی سب سے آگے

کاٹھمانڈو، 06 مارچ (ہ س)۔ نیپال میں نمائندگان اسمبلی کے ارکان کے انتخاب کے لیے ہونے والی پولنگ کے بعد ووٹوں کی گنتی جاری ہے۔ ابتدائی رجحانات سامنے آنے لگے ہیں۔ راشٹریہ سوتنتر پارٹی دیگر جماعتوں کے مقابلے میں بہت آگے ہے۔ کل 165 نشستوں میں سے اب تک تقریباً 60 نشستوں کے رجحانات مل رہے ہیں، جن میں سے 51 نشستوں پر راشٹریہ سوتنتر پارٹی کے امیدوار اپنے قریبی حریفوں سے کافی آگے چل رہے ہیں۔

الیکشن کمیشن کے مطابق، زیادہ تر اضلاع میں ووٹوں کی گنتی رات سے ہی شروع کر دی گئی تھی۔ سخت سیکورٹی انتظامات کے درمیان چیف الیکشن دفاتر میں ووٹوں کی گنتی کی جا رہی ہے۔ گنتی کے مراکز کے باہر سیکورٹی فورسز کی تعیناتی بڑھا دی گئی ہے۔ اب تک موصول ہونے والے رجحانات کے مطابق نیپالی کانگریس 5، کے پی اولی کی پارٹی نیپال کمیونسٹ پارٹی (ایمالے) 4 اور پرچنڈ کی پارٹی صرف 1 نشست پر آگے ہے۔ ان نشستوں پر دوسرے نمبر پر راشٹریہ سوتنتر پارٹی کے امیدوار بہت ہی کم ووٹوں سے پیچھے چل رہے ہیں۔

الیکشن کمیشن نے بتایا کہ براہ راست انتخابی نظام کے تحت جیتے ہوئے امیدواروں کے نتائج بتدریج اعلان کیے جائیں گے، جبکہ متناسب نمائندگی کے نظام کے لیے جماعتوں کو ملنے والے کل ووٹوں کی گنتی الگ سے کی جا رہی ہے۔ کمیشن کا کہنا ہے کہ تمام حلقوں کی گنتی مکمل ہونے میں کچھ وقت لگ سکتا ہے۔

ہندوستھان سماچار

---------------

ہندوستان سماچار / انظر حسن