فوج نے راجوری پونچھ میں پورٹر کی بھرتی کا اعلان کیا
جموں، 05 مارچ (ہ س)۔ ہندوستانی فوج نے ضلع راجوری اور پونچھ میں نئی قائم کی گئی پورٹر کمپنی کے لیے آٹھ سو پورٹرز کی بھرتی کا اعلان کیا ہے۔ سرکاری حکام کے مطابق اس مقصد کے لیے 12 مارچ سے 19 مارچ تک مختلف مقامات پر بھرتی ریلیاں منعقد کی جائیں گی۔ حکام نے بتایا کہ اس بھرتی مہم کے تحت چھ سو پورٹرز اور دو سو ریزرو پورٹرز کو فوج کی 279 پورٹر کمپنی میں شامل کیا جائے گا۔ یہ کمپنی وزارتِ دفاع کے تحت یکم اپریل سے 26 ستمبر تک، مجموعی طور پر 179 دنوں کے لیے قائم کی جا رہی ہے۔
بھرتی ریلیوں کا انعقاد راجوری اور پونچھ کے سات بریگیڈ ہیڈکوارٹرز میں کیا جائے گا۔ شیڈول کے مطابق 12 اور 13 مارچ کو پونچھ اور راجوری میں، 14 اور 15 مارچ کو بالنوئی اور نوشہرہ میں، 16 اور 17 مارچ کو بھمبر گلی میں جبکہ 18 اور 19 مارچ کو مینڈھر اور منجاکوٹ میں بھرتی عمل انجام دیا جائے گا۔
اشتہار کے مطابق امیدوار کا ہندوستانی شہری ہونا، طبی طور پر فٹ ہونا اور عمر 18 سے 40 سال کے درمیان ہونا لازمی ہے۔ امیدواروں کو ہدایت دی گئی ہے کہ وہ آدھار کارڈ، پین کارڈ، ووٹر شناختی کارڈ یا ڈرائیونگ لائسنس کی پانچ تصدیق شدہ نقول کے ساتھ اصل دستاویزات پیش کریں۔اس کے علاوہ امیدواروں کو متعلقہ گاؤں کے سرپنچ کی جانب سے جاری کردہ کردار سرٹیفکیٹ، مجاز طبی اہلکار سے طبی فٹنس سرٹیفکیٹ اور پولیس ویریفکیشن سرٹیفکیٹ بھی پیش کرنا ہوگا۔ حکام نے اہل امیدواروں کو مقررہ تاریخوں پر متعلقہ مقامات پر حاضر ہونے کی ہدایت دی ہے۔
ہندوستھان سماچار
---------------
ہندوستان سماچار / محمد اصغر
