نئی دہلی، 31 مارچ (ہ س)۔ سابق ہندوستانی ٹینس اسٹار لیانڈر پیس منگل کو بی جے پی میں شامل ہوگئے۔ وہ بی جے پی ہیڈکوارٹر میں مرکزی وزیر مملکت سکانتا مجمدار، مرکزی وزیر کرن رججو اور ایم پی انیل بلونی کی موجودگی میں بی جے پی میں شامل ہوئے۔ بی جے پی نے مغربی بنگال انتخابات سے قبل لیانڈر پیس کو پارٹی میں شامل کرکے ترنمول کانگریس کو بڑا دھچکا پہنچایا ہے۔

اس موقع پر مرکزی وزیر کرن رججو نے لیانڈر پیس کا خیر مقدم کرتے ہوئے اسے ایک تاریخی لمحہ قرار دیا۔ انہوں نے کہا کہ اب بین الاقوامی ٹینس کھلاڑی بی جے پی کے پلیٹ فارم سے ملک کی خدمت کریں گے۔ رججو نے کہا کہ لیانڈر پیس کا نام پورے ملک میں کسی تعارف کا محتاج نہیں ہے۔ انہوں نے کہا کہ پیس نے گزشتہ 12 سالوں میں کھیلوں اور کھلاڑیوں کے لیے وزیر اعظم نریندر مودی کے کام سے متاثر ہو کر بی جے پی میں شمولیت اختیار کی ہے۔ ان کا مزید کہنا تھا کہ لیانڈر پیس جیسے لیجنڈ کھلاڑی کی پارٹی میں شمولیت نہ صرف کھیلوں کی دنیا بلکہ سیاست کے لیے بھی اہم لمحہ ہے۔

اس موقع پر مرکزی وزیر سکانتا مجومدار نے ٹینس اسٹار کے بی جے پی میں شامل ہونے پر خوشی کا اظہار کیا۔ انہوں نے کہا کہ لینڈر پیس جیسے ٹینس آئیکون کی پارٹی میں آمد بی جے پی کے لیے ایک بڑا دن ہے۔ مجمدار نے کہا کہ پیس بنگال کے نوجوانوں کے لیے ایک تحریک ہیں اور ان کی موجودگی آنے والے انتخابات میں پارٹی کو مضبوط کرے گی۔ مجمدار نے مزید کہا کہ یہ ریاست میں 'زعفرانی لہر' بننے کا واضح اشارہ ہے۔ انہوں نے یہ بھی نشاندہی کی کہ لیانڈر پیس 19ویں صدی کے مشہور بنگالی شاعر اور ڈرامہ نگار مائیکل مدھوسودن دت کی براہ راست اولاد ہیں۔

ہندوستھان سماچار

ہندوستان سماچار / Mohammad Khan