جموں, 31 مارچ (ہ س)۔
وزیر اعلیٰ عمر عبداللہ نے کہا ہے کہ مشن یووا ملک بھر میں خود روزگار اسکیموں کے لیے ایک مثالی ماڈل بن سکتا ہے اور جموں و کشمیر اس حوالے سے قومی سطح پر ایک نئی مثال قائم کرے گا۔وہ یہاں کنونشن سینٹر میں منعقدہ یووا مہوتسو—مشن یووا پروگرام سے خطاب کر رہے تھے۔ اس موقع پر انہوں نے اسکیم سے مستفید ہونے والے نوجوان کاروباریوں سے بات چیت بھی کی۔
وزیر اعلیٰ نے کہا کہ جموں و کشمیر میں بے روزگاری ایک بڑا اور پیچیدہ مسئلہ ہے جسے صرف سرکاری نوکریوں کے ذریعے حل نہیں کیا جا سکتا۔ انہوں نے کہا کہ حکومت کی ذمہ داری ہے کہ وہ ملازمتیں فراہم کرے، لیکن ہر ایک کو سرکاری نوکری دینا ممکن نہیں، اس لیے نوجوانوں کو خود روزگار کی طرف راغب کرنا ضروری ہے۔انہوں نے زور دیا کہ نوجوان نوکریاں تلاش کرنے کے بجائے خود روزگار پیدا کریں اور دوسروں کے لیے بھی مواقع فراہم کریں۔ انہوں نے کہا کہ حکومت نوجوانوں کو اس قابل بنانا چاہتی ہے کہ وہ روزگار فراہم کرنے والے بنیں۔
وزیر اعلیٰ نے کہا کہ مشن یووا کو مشن موڈ میں نافذ کیا جا رہا ہے، جس سے اس میں سنجیدگی اور رفتار آئی ہے۔ انہوں نے بتایا کہ ایک سال کے اندر اس اسکیم کے تحت ایک ہزار کروڑ روپے کی مالی معاونت فراہم کی جا چکی ہے۔
انہوں نے جموں و کشمیر بینک کے کردار کو سراہتے ہوئے کہا کہ بینک کے تعاون کے بغیر اس اسکیم کی کامیابی ممکن نہیں تھی۔ انہوں نے کہا کہ نوجوان کاروباریوں کو قرض حاصل کرنے میں مختلف مشکلات کا سامنا کرنا پڑتا ہے، جنہیں کم کرنے کے لیے اقدامات کیے جا رہے ہیں۔اس موقع پر وزیر اعلیٰ نے ایک روزہ میگا ڈسبرسل کے تحت 3003 کیسز میں 100 کروڑ روپے سے زائد رقم تقسیم کی، جبکہ زرعی و متعلقہ شعبوں کے لیے کریڈٹ گارنٹی فنڈ کا بھی آغاز کیا گیا۔ اس کے علاوہ 20 اسمال بزنس ڈیولپمنٹ یونٹس کا ڈیجیٹل افتتاح بھی عمل میں لایا گیا۔تقریب میں نائب وزیر اعلیٰ سریندر کمار چودھری، چیف سکریٹری اٹل ڈلو، جے اینڈ کے بینک کے سی ای او امتاوہ چٹرجی سمیت دیگر وزراء، ارکان اسمبلی، افسران اور کاروباری حضرات نے شرکت کی۔
ہندوستھان سماچار
---------------
ہندوستان سماچار / محمد اصغر
