شولاپور ممبئی ، 31 مارچ (ہ س) شولاپور شہر میں سپریم کورٹ کی ہدایات کے مطابق ڈی جے پر پابندی عائد ہے اور اب تک تمام جلوس ڈی جے کے بغیر نکالے گئے ہیں، پولیس کمشنر ایم راج کمار نے بتایا کہ بھارت رتن ڈاکٹر بابا صاحب امبیڈکر جینتی کے موقع پر نکالے جانے والے جلوس بھی اسی اصول کے تحت ڈی جے سے پاک ہوں گے ۔

انہوں نے کہا کہ اس سلسلے میں شہر کے مختلف پولیس تھانوں میں جلوس نکالنے والی تنظیموں کے عہدیداران کے ساتھ میٹنگز کی جا رہی ہیں اور انہیں قواعد و ضوابط پر عمل کرنے کی اپیل کی جا رہی ہے، تاکہ اگر کسی نے ڈی جے کی بکنگ کی ہو تو اسے نقصان نہ اٹھانا پڑے۔

پولیس کے مطابق مقررہ صوتی حد کے اندر رہتے ہوئے جلوس میں چار اسپیکر لگانے کی اجازت دی گئی ہے، جبکہ تنظیموں سے کہا گیا ہے کہ وہ ڈی جے پر خرچ کرنے کے بجائے سماجی سرگرمیوں اور دیدہ زیب جھانکیوں پر توجہ دیں تاکہ خواتین اور بچوں سمیت عام شہری بھی جلوسوں سے لطف اندوز ہو سکیں۔

پولیس حکام نے بتایا کہ گنیش اتسو کے بعد سے شہر میں کسی بھی جلوس میں ڈی جے استعمال نہیں کیا گیا ہے اور اس روایت کو برقرار رکھنے کے لیے سخت نگرانی کی جا رہی ہے۔ اس سلسلے میں شہر کے سات پولیس تھانوں کے انچارج افسران عمل درآمد کو یقینی بنا رہے ہیں۔

انہوں نے اعتماد ظاہر کیا کہ امبیڈکر جینتی کے جلوس بھی مکمل طور پر ڈی جے سے پاک ہوں گے، جبکہ پولیس تھانوں میں منعقدہ اجلاسوں میں تمام تنظیموں کے نمائندوں نے انتظامیہ کی اپیل پر مثبت ردعمل ظاہر کیا ہے۔

ہندوستھان سماچار

--------------------

ہندوستان سماچار / جاوید این اے