علی گڑھ، 30 مارچ (ہ س)۔

ریاستی حکومت نے آنگن واڑی نظام کو مضبوط اور جدید بنانے کے لیے ایک اہم اقدام اٹھایا ہے۔ اس سلسلے میں وزیر اعلیٰ یوگی آدیتہ ناتھ نے لکھنؤ میں منعقد ایک عظیم الشان پروگرام کے دوران آنگن واڑی کارکنان کو جدید سہولیات اور وسائل فراہم کیے۔

اس پروگرام کے تحت ہزاروں مرکزی سیوکاؤں کو اسمارٹ فونز، لاکھوں کارکنان کو بچوں کی نشوونما کی نگرانی کے آلات (گروتھ مانیٹرنگ ڈیوائسز) اور بڑی تعداد میں معاونین کو تقرری نامے دیے گئے۔ اس کے علاوہ متعدد آنگن واڑی مراکز اور بال ترقی پروجیکٹ دفاتر کا افتتاح اور سنگ بنیاد بھی رکھا گیا۔

لکھنؤ میں ہونے والے اس پروگرام کی براہِ راست نشریات ضلع کلیکٹریٹ کے آڈیٹوریم میں دیکھی گئیں، جہاں ضلع سطح پر بھی ایک باوقار تقریب منعقد ہوئی۔ اس موقع پر مختلف عوامی نمائندے اور افسران موجود تھے، جن میں ضلع پنچایت کی صدر وجے سنگھ، ایم ایل سی پروفیسر طارق منصور، اور دیگر معزز شخصیات شامل تھیں۔

اس اقدام سے نہ صرف خواتین کو روزگار کے مواقع ملیں گے بلکہ بچوں کی صحت اور نشوونما کے نظام میں بھی بہتری آئے گی، جو کہ خواتین کو بااختیار بنانے اور معاشرتی ترقی کی جانب ایک مثبت قدم ہے۔

ضلع میں منعقدہ پروگرام کے دوران 13 آنگن واڑی کارکنان اور 743 معاونین کو تقرری نامے تقسیم کیے گئے، جبکہ 11 مرکزی سیوکاؤں کو اسمارٹ فونز فراہم کیے گئے۔ اس کے ساتھ ہی 13 نئے تعمیر شدہ آنگن واڑی مراکز کی عمارتوں کا افتتاح کیا گیا اور گرام پردھانوں کو بھی اعزاز سے نوازا گیا۔ ضلع پروگرام افسر کے۔کے۔ رائے نے بتایا کہ ہر آنگن واڑی مرکز کی تعمیر تقریباً 11.84 لاکھ روپے کی لاگت سے مکمل ہوئی ہے۔ انہوں نے کہا کہ 907 معاونین کی بھرتی کے عمل میں مکمل شفافیت کو یقینی بنایا گیا، جس کے تحت 743 امیدواروں کا انتخاب کیا گیا۔انہوں نے مزید بتایا کہ مختلف ترقیاتی بلاکس میں معاونین کی تقرری اس طرح کی گئی: دھنی پور میں 85، اکرآباد میں 53، گنگیری میں 70، شہر میں 75، جواں میں 66، ٹپل میں 49، گونڈا میں 38، اگل میں 67، کھیر میں 58، بجولی میں 46، چندوس میں 48، لودھا میں 46 اور اترولی میں 42 معاونین کو تعینات کیا گیا۔

ہندوستھان سماچار

ہندوستان سماچار / سید کامران علی گڑھ