سینٹ کٹس، 28 مارچ (ہ س)۔ سینٹ کٹس کے باسیٹیر میں جمعہ کی رات کھیلے گئے پہلے ون ڈے مقابلے میں آسٹریلیا نے شاندار کارکردگی کا مظاہرہ کرتے ہوئے ویسٹ انڈیز کو 103 رن سے ہرا کر تین میچوں کی سیریز میں 0-1 کی برتری حاصل کر لی۔ نئی کپتان سوفی مولینیو کی قیادت میں ٹیم نے شاندار جیت درج کی۔

پہلے بلے بازی کرتے ہوئے آسٹریلیا نے 341 رن کا بڑا اسکور کھڑا کیا۔ ٹیم کا آغاز مضبوط رہا اور سلامی جوڑی نے 75 رن جوڑے۔ جارجیا وول نے 32 گیندوں میں 42 رن بنائے، جبکہ فوبی لچفیلڈ نے 72 گیندوں پر 77 رن کی اہم اننگز کھیلی۔ ایلیس پیری نے 46 گیندوں میں 44 رن بنا کر ٹیم کو مضبوطی بخشی۔

مڈل آرڈر میں کپتان سوفی مولینیو نے 47 رن بنائے اور نکولا کیری (49) کے ساتھ 91 رن کی شراکت داری کی۔ آخر میں جارجیا ویرہیم نے 42 رن بنا کر ٹیم کو 300 کے پار پہنچایا۔ ویسٹ انڈیز کی جانب سے افی فلیچر نے 3 وکٹ لیے، لیکن وہ کافی مہنگی ثابت ہوئیں۔

ہدف کا تعاقب کرنے اتری ویسٹ انڈیز کا آغاز خراب رہا اور ٹیم نے جلد وکٹ گنوا دیے، جس میں کپتان ہیلی میتھیوز کی وکٹ بھی شامل تھی۔ تجربہ کار بلے باز اسٹیفنی ٹیلر نے شاندار ناٹ آوٹ 105 رن بنا کر ٹیم کو سنبھالنے کی کوشش کی، جو ان کی 2021 کے بعد پہلی ون ڈے سنچری تھی، لیکن انہیں دوسرے اینڈ سے خاطر خواہ تعاون نہیں ملا۔ چینیل ہنری نے 38 رن بنائے۔

آسٹریلیا کی جانب سے کم گرتھ نے بہترین گیندبازی کرتے ہوئے 3 وکٹ حاصل کیے، جبکہ ایشلے گارڈنر نے بھی اہم تعاون دیا۔ بالآخر ویسٹ انڈیز کی ٹیم 238/8 تک ہی پہنچ سکی اور مقابلہ ہار گئی۔

مختصر اسکور:

آسٹریلیا – 341 آل آوٹ (فوبی لچفیلڈ 77، افی فلیچر 3/83)۔

ویسٹ انڈیز – 238/8 (اسٹیفنی ٹیلر 105، کم گرتھ 3/37)۔

آسٹریلیا 103 رن سے فاتح رہا۔

ہندوستھان سماچار

---------------

ہندوستان سماچار / انظر حسن