علی گڑھ، 27 مارچ (ہ س)۔

علی گڑھ کےاترولی کوتوالی کے گاؤں جیرولی دھوم سنگھ میں رام گھاٹ-کلیان روڈ پر ایک افسوسناک حادثہ پیش آیا، جہاں ٹریکٹر نے سائیکل سوار ایک کمسن لڑکے کو کچل دیا، جس کے نتیجے میں اس کی موقع پر ہی موت ہو گئی۔

اطلاعات کے مطابق گاؤں جیرولی دھوم سنگھ کے رہنے والے 16 سالہ وشال ولد تیج ویر سنگھ 27 مارچ کی صبح تقریباً 9 بجے سائیکل سے ڈیزل لینے پٹرول پمپ جا رہے تھے۔ اسی دوران رام گھاٹ-کلیان روڈ پر اوم ویر ڈھابہ کے سامنے ایک ٹریکٹر نے ان کی سائیکل کو ٹکر مار دی، جس کے بعد ٹریکٹر کا پہیہ ان کے سر کے اوپر سے گزر گیا اور وہ موقع پر ہی دم توڑ گئے۔

حادثے کی خبر ملتے ہی اہلِ خانہ میں کہرام مچ گیا اور موقع پر لوگوں کی بھیڑ جمع ہو گئی۔ مشتعل افراد نے سڑک جام کرنے کی کوشش کی، تاہم پولیس نے موقع پر پہنچ کر کارروائی کا یقین دلا کر حالات کو قابو میں کر لیا۔

متوفی وشال پانچ بھائیوں میں چوتھے نمبر پر تھا۔ ان کے والد تیج ویر سنگھ گاؤں میں گنے کا رس فروخت کرتے ہیں۔ سی او راجیو دویویدی کے مطابق حادثے میں ملوث ٹریکٹر کو قبضے میں لے لیا گیا ہے اور پولیس معاملے کی تفتیش کر رہی ہے۔ لاش کو پوسٹ مارٹم کے لیے بھیج دیا گیا ہے۔

ہندوستھان سماچار

ہندوستان سماچار / سید کامران علی گڑھ