2030 تک مرحلہ وار سستی بجلی سے گھریلو، صنعتی و تجارتی صارفین کو بڑا فائدہممبئی ممبئی ، 27 مارچ (ہ س)۔ مہاراشٹر میں بجلی نرخ میں کمی کے فیصلے پر بی جے پی کے ریاستی ترجمان اور مہاوِترن کے آزاد ڈائریکٹر وشواس پاٹھک نے وزیر اعلیٰ دیویندر فڑنویس کا شکریہ ادا کرتے ہوئے کہا کہ اس اقدام سے ریاست کے تمام بجلی صارفین کو بڑا فائدہ ہوگا۔انہوں نے بتایا کہ مہاراشٹر الیکٹرک ریگولیٹری کمیشن نے مہاوِترن کی جانب سے پیش کردہ بجلی نرخ میں کمی کے تجویز کو منظوری دے دی ہے، جس کے تحت 2030 تک اگلے پانچ برسوں میں مرحلہ وار بجلی کے نرخ کم کیے جائیں گے۔پاٹھک کے مطابق گزشتہ ایک سال کے دوران اس معاملے پر کمیشن، ہائی کورٹ اور سپریم کورٹ کی سطح پر مختلف سماعتیں ہوئیں، جس کے بعد اب قانونی عمل مکمل ہونے سے صورتحال واضح ہو گئی ہے۔انہوں نے کہا کہ وزیر اعلیٰ فڑنویس کی قیادت میں ریاست میں سرمایہ کاری بڑھ رہی ہے اور بجلی نرخ میں کمی سے معاشی ترقی کو مزید تقویت ملے گی۔ انہوں نے واضح کیا کہ آئندہ پانچ برسوں میں کسی بھی زمرے کے صارفین کے لیے بجلی نرخ میں اضافہ نہیں ہوگا بلکہ صرف کمی ہی کی جائے گی۔انہوں نے مزید بتایا کہ ماہانہ 100 یونٹ تک بجلی استعمال کرنے والے صارفین کے لیے پانچ سال میں 26 فیصد تک کمی ہوگی، جبکہ یہ طبقہ کل گھریلو صارفین کا تقریباً 70 فیصد ہے۔ اسی طرح 100 سے 300 یونٹ استعمال کرنے والوں کے لیے تقریباً 5 فیصد کمی متوقع ہے۔پاٹھک کے مطابق مالی سال 2026 سے 2030 تک کے لیے جاری حکم کے تحت 2026-27 میں داخل ہونے پر صارفین کو دوسرے سال کے نرخ کا فائدہ ملے گا، جس سے مزید رعایت حاصل ہوگی۔انہوں نے بتایا کہ صبح 9 بجے سے شام 5 بجے تک (سولر اوقات میں) استعمال ہونے والی بجلی پر رعایت 8 پیسے سے بڑھا کر 85 پیسے فی یونٹ کر دی گئی ہے۔ اسی طرح 100 یونٹ تک استعمال کرنے والوں کے لیے اوسط نرخ 7 روپے 10 پیسے اور 100 سے 300 یونٹ استعمال کرنے والوں کے لیے 12 روپے 94 پیسے مقرر ہوگا، جبکہ صنعتی صارفین کے نرخ بھی مزید کم ہوں گے۔انہوں نے کہا کہ کمیشن نے برقی گاڑیوں کے چارجنگ اسٹیشنز کے لیے بھی نرخ مقرر کیے ہیں، جو زرعی شعبے کے علاوہ اوسط سپلائی ریٹ سے کم رکھے گئے ہیں۔ ہائی اور لو وولٹیج چارجنگ اسٹیشنز کے لیے نرخ 9 روپے 50 پیسے فی یونٹ مقرر کیا گیا ہے، جو 2030 تک تقریباً مستحکم رہے گا، جس سے الیکٹرک گاڑیوں کے استعمال کو فروغ ملے گا۔ہندوستھان سماچار
--------------------
ہندوستان سماچار / جاوید این اے
