وزیر اعلیٰ نے کونو ندی میں ریلیز کیے گھڑیال اور کچھوے

بھوپال، یکم مارچ (ہ س)۔

مدھیہ پردیش کے وزیر اعلیٰ ڈاکٹر موہن یادو نے کہا کہ ریاست میں گھڑیال اور کچھووں کا تحفظ اور فروغ کیا جا رہا ہے۔ ناپید ہونے والے جانداروں کے تحفظ کے عزم کے ساتھ مدھیہ پردیش حکومت کام کر رہی ہے۔

وزیر اعلیٰ ڈاکٹر یادو نے اتوار کو کونو نیشنل پارک میں واقع کونو ندی میں گھڑیال اور کچھووں کو ریلیز کرنے کے بعد یہ بات کہی۔ انہوں نے کہا کہ مدھیہ پردیش میں سیاحت کے شعبے میں مسلسل ترقی ہو رہی ہے۔ وزیر اعظم نریندر مودی کی پہل پر شروع ہوا چیتا پروجیکٹ مسلسل کامیابی کی طرف آگے بڑھ رہا ہے۔ اس سے ریاست میں چیتوں کی تعداد بڑھ کر 48 ہو گئی ہے۔ وزیر اعلیٰ ڈاکٹر یادو نے کہا کہ اس سال مدھیہ پردیش آنے والے سیاحوں کی تعداد میں بھی اضافہ ہوا ہے۔

وزیر اعلیٰ ڈاکٹر یادو نے کونو نیشنل پارک میں واقع کونو ندی میں 53 گھڑیال اور 25 کچھوے ندی میں ریلیز کیے۔ گیویلیس گینگٹکس نام کے چھوڑے گئے 53 گھڑیال میں سے 28 نر اور 25 مادہ شامل ہیں۔ اسی طرح 25 کچھوے تھری اسٹرپڈ روف ٹرٹل نسل کے ہیں، جن کا سائنسی نام واٹاگرو ڈوگوکا ہے۔

اس موقع پر سینئر رکن اسمبلی اور بی جے پی کے ریاستی صدر ہیمنت کھنڈیلوال، سابق وزیر جنگلات رام نواس راوت، سہریا ڈیولپمنٹ اتھارٹی کے چیئرمین ترسن پال بریا، نائب صدر سیتارام آدیواسی، ضلع پنچایت صدر گڈی بائی آدیواسی، رکن اسمبلی برج راج سنگھ چوہان، پرنسپل سکریٹری جنگلات سندیپ یادو، کمشنر سریش کمار، ڈی آئی جی سچن اتولکر، کلکٹر ارپت ورما، ڈائریکٹر نیشنل چمبل سینکچری، ڈی ایف او ہریش بگھیل، کونو ڈی ایف او آر تروکرال اور عوامی نمائندے موجود رہے۔ اس دوران نیشنل چمبل سینکچری دیوری مرینا کی جانب سے یادگاری نشانات پیش کیے گئے۔

ہندوستھان سماچار

---------------

ہندوستان سماچار / انظر حسن