علی گڑھ, 23 فروری (ہ س)

علی گڑھ مسلم یونیورسٹی کی فیکلٹی آف یونانی میڈیسن نے متحدہ عرب امارات کے دبئی ورلڈ ٹریڈ سینٹر میں منعقدہ تیسری بین الاقوامی آیوش کانفرنس و نمائش میں اپنی مؤثر موجودگی درج کرائی۔ ”ذہن و جسم کی صحت میں شواہد پر مبنی آیوش مداخلتیں“کے عنوان پر منعقدہ اس کانفرنس کا مشترکہ طور پر سائنس انڈیا فورم اور ورلڈ آیوروید فاؤنڈیشن نے اہتمام کیا، جسے حکومت ہند کی وزارتِ آیوش اور دبئی میں ہندوستانی قونصل خانے کی معاونت حاصل تھی۔ پروگرام میں 30 ممالک سے تقریباً 2,000 مندوبین نے شرکت کی۔

ڈاکٹر عرشی ریاض نے طرزِ زندگی سے متعلق امراض پر مقالہ پیش کیا، ڈاکٹر صبا زیدی نے ذہنی صحت پر خطاب کیا، ڈاکٹر رہیدہ ہلال نے آنتوں کی صحت پر گفتگو کی، جبکہ ڈاکٹر رابعہ ریاض نے صحت مند بڑھاپے اور طویل العمری سے متعلق اپنی تحقیق پیش کی۔ ان کی پیشکش کو سیشن چیئرپرسنز اور مندوبین نے سراہا۔ اس بین الاقوامی فورم نے علمی تبادلے اور باہمی تعاون کے نئے مواقع فراہم کیے اور یونانی طب کے میدان میں تحقیق اور طبی امتیاز کے فروغ میں اے ایم یو کے کردار کو مزید مستحکم کیا۔

---------------

ہندوستان سماچار / سید کامران علی گڑھ