کشتواڑ میں ہلاک دہشت شدہ گردوں کا تعلق اسرائیل گروپ سے تھا۔ آئی جی پی
جموں، 23 فروری (ہ س)۔ جموں زون پولیس کے انسپکٹر جنرل بھیم سین توتی نے بتایا کہ کشتواڑ میں سیکورٹی فورسز نے مشترکہ کارروائی کے دوران جیش محمد (جے ای ایم) کے سات رکنی دہشت گرد ماڈیول کو ختم کر دیا ہے، جسے اسرائیل گروپ کے نام سے جانا جاتا تھا۔ اس کے ساتھ ہی ضلع کشتواڑ میں ڈیڑھ سال سے جاری آپریشن اپنے منطقی انجام کو پہنچ گیا۔
آئی جی پی نے کشتواڑ میں نامہ نگاروں کو بتایا کہ ماڈیول کے تین ارکان، جن میں خود ساختہ کمانڈر سیف اللہ بھی شامل تھا، اتوار کو چھاترو علاقے میں سیکورٹی فورسز کے ساتھ جھڑپ میں مارے گئے۔ انہوں نے کہا کہ یہ گروپ اپریل 2024 میں دراندازی کر کے بھارتی حدود میں داخل ہوا تھا اور اس عرصے کے دوران 17 مختلف مواقع پر فورسز کے ساتھ اس کی جھڑپیں ہوئیں۔
انہوں نے ماڈیول کو ایک سخت گیر اور منظم دہشت گرد گروپ قرار دیتے ہوئے کہا کہ اس نے سیکورٹی اہلکاروں کے ساتھ ساتھ عام شہریوں کو بھی نشانہ بنایا۔ مصدقہ خفیہ اطلاعات کی بنیاد پر آخری مرحلے کی کارروائی عمل میں لائی گئی، جس میں گروپ کے باقی ماندہ تین دہشت گردوں کو ہلاک کیا گیا۔
آئی جی پی نے واضح کیا کہ خطے میں دہشت گردی کے خاتمے تک کارروائیاں جاری رہیں گی۔ انہوں نے کہا کہ سیکورٹی فورسز مستقبل میں بھی اسی عزم کے ساتھ دہشت گرد عناصر کے خلاف آپریشنز جاری رکھیں گی تاکہ پورے نیٹ ورک کا مکمل صفایا کیا جا سکے۔
ہندوستھان سماچار
---------------
ہندوستان سماچار / محمد اصغر
