نئی دہلی/کھڑگپور، 7 جنوری (ہ س): انڈین انسٹی ٹیوٹ آف ٹیکنالوجی (آئی آئی ٹی) کھڑگپور کے ڈائریکٹر پروفیسر سمن چکرورتی نے بدھ کو نئی دہلی میں مرکزی وزیر تعلیم دھرمیندر پردھان سے ملاقات کی۔ ملاقات کے دوران ادارے کی گزشتہ چھ ماہ کی کامیابیوں اور مستقبل کے منصوبوں پر تفصیلی تبادلہ خیال کیا گیا۔

مرکزی وزیر دھرمیندر پردھان نے طلباء کی فلاح و بہبود اور کمیونٹی پر مرکوز ٹیکنالوجی کی ترقی کے شعبوں میں آئی آئی ٹی کھڑگپور کے کام کی تعریف کی۔ انہوں نے خاص طور پر نوجوانوں کو ملازمت کے متلاشیوں کے بجائے جاب تخلیق کاروں (انٹرپرینیور) میں تبدیل کرنے کے لیے ادارے کی کوششوں پر اطمینان کا اظہار کیا۔

میٹنگ کے دوران مرکزی وزیر نے اس بات پر زور دیا کہ آئی آئی ٹی کھڑگپور کو ملک کے مشرقی خطہ میں قائدانہ کردار ادا کرنا چاہیے۔ انہوں نے تجویز پیش کی کہ انسٹی ٹیوٹ کو ہب اینڈ اسپوک ماڈل کے ذریعے اجتماعی فضیلت کو مضبوط کرنا چاہیے۔ انہوں نے اس اعتماد کا اظہار کیا کہ اس طرح کے اقدامات مشرقی ہندوستان کے ترقیاتی منظر نامے کو تبدیل کر سکتے ہیں اور خطے کو ترقی یافتہ ہندوستان کے قومی ہدف میں اہم شراکت دار بنا سکتے ہیں۔

وزیر تعلیم نے انسٹی ٹیوٹ کو اعلیٰ اثرات کے حامل منصوبوں کی تیاری اور ان پر عمل درآمد میں ہر ممکن رہنمائی اور تعاون کا یقین دلایا۔ پروفیسر چکرورتی نے کثیر جہتی ترقی اور عالمی فضیلت کے لیے مرکزی وزیر کے دور اندیش وژن کے لیے اظہار تشکر کیا۔

---------------

ہندوستان سماچار / عبدالسلام صدیقی