کولکاتا، 7 جنوری (ہ س)۔ پرواز کے دوران ایک غیر ملکی مسافر کی اچانک شدید طبیعت خراب ہونے کے بعد بدھ کی دوپہر طیارے کو ہنگامی حالت میں کولکاتا میں اتارنا پڑا۔ جرمن شہری لُڈوِگ مانفریڈ بیولر (66) کو فی الحال شہر کے ای ایم بائی پاس علاقے میں واقع ایک نجی اسپتال میں داخل کرایا گیا ہے۔ اسپتال ذرائع کے مطابق انہیں شدید برین ہیمرج ہوا ہے اور فوری آپریشن کی ضرورت بتائی گئی ہے۔
یہ واقعہ منگل کی رات کا ہے۔ ویتنام ایئرلائنز کی ایک بین الاقوامی پرواز 276 مسافروں کو لے کر فرینکفرٹ سے ہنوئی جا رہی تھی۔ اسی پرواز میں لُڈوِگ مانفریڈ بیولر اکیلے سفر کر رہے تھے۔ دورانِ پرواز اچانک انہیں بے چینی محسوس ہوئی اور ان کی حالت تیزی سے بگڑنے لگی۔ صورتحال کی سنگینی کو دیکھتے ہوئے، پائلٹ نے وارانسی کے اوپر فضائی حدود میں رہتے ہوئے کولکاتا کے ایئر ٹریفک کنٹرول سے رابطہ کیا اور ایک مسافر کی طبیعت خراب ہونے کی اطلاع دی۔
اس کے بعد فوری فیصلہ لیتے ہوئے طیارے کا رخ موڑ دیا گیا اور اسے کولکاتا ایئرپورٹ پر اتارا گیا۔ طیارہ لینڈ کرتے ہی ایئرپورٹ پر موجود ڈاکٹروں کی ٹیم نے مسافر کا ابتدائی معائنہ کیا۔ معائنہ کے بعد حالت کو دیکھتے ہوئے انہیں فوراً ای ایم بائی پاس کے قریب واقع ایک نجی اسپتال منتقل کر دیا گیا۔
اسپتال میں کیے گئے طبی ٹیسٹوں میں شدید برین ہیمرج کی تصدیق ہوئی ہے۔ ڈاکٹروں کے مطابق مریض کی حالت نازک بنی ہوئی ہے اور آپریشن انتہائی ضروری ہے۔ چونکہ لُڈوِگ مانفریڈ بیولر اکیلے سفر کر رہے تھے، اس لیے اسپتال انتظامیہ نے جرمن سفارت خانے سے رابطہ شروع کر دیا ہے تاکہ آئندہ علاج اور ضروری رسمی کارروائیوں کے سلسلے میں تال میل قائم کیا جا سکے۔
فی الحال مریض اسپتال میں زیرِ علاج ہے اور ڈاکٹروں کی ایک خصوصی ٹیم اس کی نگرانی کر رہی ہے۔ واقعے کے بعد طیارے میں سوار دیگر مسافروں کے سفر کا انتظام بعد میں کیا گیا۔
ہندوستھان سماچار
---------------
ہندوستان سماچار / عبدالواحد
