سلطان پور، 6 جنوری (ہ س)۔ ضلع کی ایم پی-ایم ایل اے عدالت میں منگل کو رائے بریلی کے ایم پی راہل گاندھی کے خلاف ہتک عزت کے مقدمے کی سماعت ہوئی۔ راہل گاندھی کے وکیل کاشی پرساد شکلا نے گواہ رام چندر دوبےسے جرح کی۔اس کے بعد عدالت نے آگے کی سماعت کے لئے 19 جنوری کی تاریخ مقرر کی ہے۔ مدعی وجے مشرا کے وکیل سنتوش پانڈے کے مطابق عدالت اب راہل گاندھی کو دفعہ 313 کے تحت طلب کرے گی۔

کوتوالی دیہات کے ہنومان گنج کے رہائشی بی جے پی لیڈر وجے مشرا نے اکتوبر 2018 میں راہل گاندھی کے خلاف ہتک عزت کا مقدمہ دائر کیا تھا۔ انہوں نے الزام لگایا کہ گاندھی نے اگست 2018 میں کرناٹک انتخابی مہم کے دوران اس وقت کے بی جے پی صدر امت شاہ کے بارے میں توہین آمیز تبصرے کیے تھے۔ یہ کیس گزشتہ پانچ برسوں سے عدالتی کارروائی میں زیر التوا ہے۔

دسمبر 2023 میں، جب راہل گاندھی اس معاملے میں عدالت میں حاضر نہیں ہوئے، اس وقت کے جج نے ان کے خلاف وارنٹ جاری کیا۔ اس کے بعد 20 فروری 2024 کو، راہل نے عدالت میں خودسپردگی کی، جہاں خصوصی مجسٹریٹ نے انہیں 25 ہزار روپے کی دو ضمانتوں پر ضمانت دی۔ 26 جولائی 2024 کو راہل نے عدالت میں اپنا بیان درج کراتے ہوئے خود کو بے قصور بتایا اور اسے سیاسی سازش قرار دیا۔

راہل گاندھی کے بیان کے بعد عدالت نے مدعیان کو ثبوت پیش کرنے کی ہدایت کی۔ اس کے بعد سے مسلسل گواہ پیش کیے جا رہے ہیں۔ اب تک صرف ایک گواہ سے جرح مکمل ہو سکی ہے جبکہ دوسرے گواہ سے جرح جاری ہے۔اکثر ہڑتالوں اور گواہوں کی عدم موجودگی کی وجہ سے کارروائی میں تاخیر ہورہی ہے۔

ہندوستھان سماچار

ہندوستان سماچار / محمد شہزاد