نئی دہلی، 20 جنوری (ہ س)۔ امریکی صدر ڈونالڈ ٹرمپ کے ذریعے یورپی ممالک پر اضافی ٹیرف لگانے کی دھمکی دینے کے بعد پیدا شدہ عالمی دباو کا اثر آج گھریلو شیئر مارکیٹ کے ابتدائی کاروبار پر بھی نظر آ رہا ہے۔ آج کے کاروبار کی شروعات معمولی گراوٹ کے ساتھ ہوئی تھی۔ مارکیٹ کھلتے ہی خریداری کی حمایت سے سینسیکس اور نفٹی دونوں انڈیکس کی چال میں معمولی تیزی نظر آئی، لیکن تھوڑی ہی دیر بعد چوطرفہ فروخت شروع ہو گئی۔ مسلسل ہو رہی فروخت کے سبب دونوں انڈیکس کی کمزوری بھی بڑھتی چلی گئی۔ پہلے 1 گھنٹے کا کاروبار ہونے کے بعد سینسیکس 0.40 فیصد اور نفٹی 0.46 فیصد کی کمزوری کے ساتھ کاروبار کر رہے تھے۔

ابتدائی ایک گھنٹے کا کاروبار ہونے کے بعد شیئر مارکیٹ کے سرکردہ شیئروں میں سے این ٹی پی سی، ایس بی آئی، ہندوستان یونی لیور، کوٹک مہندرا اور الٹراٹیک سیمنٹ کے شیئر 1.18 فیصد سے لے کر 0.47 فیصد کی مضبوطی کے ساتھ کاروبار کر رہے تھے۔ دوسری جانب، بجاج فائنانس، ایٹرنل، ٹیک مہندرا، بجاج فنسرو اور ٹرینٹ لمیٹڈ کے شیئر 2.50 فیصد سے لے کر 1.67 فیصد کی کمزوری کے ساتھ کاروبار کرتے ہوئے نظر آ رہے تھے۔

ابھی تک کے کاروبار میں شیئر مارکیٹ میں 2,652 شیئروں میں ایکٹیو ٹریڈنگ ہو رہی تھی۔ ان میں سے 533 شیئر منافع وصولی کر کے سبز نشان میں کاروبار کر رہے تھے، جبکہ 2,119 شیئر نقصان اٹھا کر سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 7 شیئر خریداری کی حمایت سے سبز نشان میں برقرار تھے۔ دوسری جانب 23 شیئر فروخت کے دباو میں سرخ نشان میں کاروبار کر رہے تھے۔ جبکہ نفٹی میں شامل 50 شیئروں میں سے 6 شیئر سبز نشان میں اور 44 شیئر سرخ نشان میں کاروبار کرتے نظر آ رہے تھے۔

بی ایس ای کا سینسیکس آج 38.80 کی معمولی گراوٹ کے ساتھ 83,207.38 پوائنٹس کی سطح پر کھلا۔ کاروبار کی شروعات ہوتے ہی خریداری کی حمایت سے پہلے دو منٹ میں ہی یہ انڈیکس اچھل کر سبز نشان میں 83,254.28 پوائنٹس تک پہنچ گیا۔ اس کے بعد مارکیٹ میں فروخت کا دباو بن گیا، جس کی وجہ سے سینسیکس دوبارہ سرخ نشان میں گر گیا۔ مسلسل ہو رہی فروخت کے سبب یہ انڈیکس ٹوٹ کر 82,812.32 پوائنٹس کی سطح تک آ گیا۔ حالانکہ اس کے بعد ہوئی معمولی خریداری کی حمایت سے اس انڈیکس کی حالت میں تھوڑا سدھار ہوتا ہوا بھی نظر آیا۔ مارکیٹ میں مسلسل جاری خرید و فروخت کے درمیان پہلے ایک گھنٹے کا کاروبار ہونے کے بعد صبح 10.15 بجے سینسیکس 333.65 پوائنٹس گر کر 82,912.53 پوائنٹس کی سطح پر کاروبار کر رہا تھا۔

سینسیکس کی طرح ہی این ایس ای کے نفٹی نے آج صرف 5.20 پوائنٹس پھسل کر 25,580.30 پوائنٹس کی سطح سے کاروبار کی شروعات کی۔ مارکیٹ کھلنے کے تھوڑی دیر بعد ہی چوطرفہ فروخت شروع ہو گئی، جس کی وجہ سے اس انڈیکس کی کمزوری بڑھنے لگی۔ مسلسل ہو رہی فروخت کے سبب صبح 10 بجے کے تھوڑی دیر پہلے نفٹی 150 پوائنٹس سے بھی زیادہ گر کر 25,432.60 پوائنٹس کی سطح تک آ گیا۔ اس کے بعد خریداروں نے مارکیٹ میں خریداری کا زور بنا دیا، جس کی وجہ سے اس انڈیکس کی حالت میں سدھار ہونے لگا۔ مارکیٹ میں مسلسل جاری خرید و فروخت کے درمیان ابتدائی ایک گھنٹے کا کاروبار ہونے کے بعد صبح 10.15 بجے نفٹی 118 پوائنٹس کی کمزوری کے ساتھ 25,467.50 پوائنٹس کی سطح پر کاروبار کر رہا تھا۔

ہندوستھان سماچار

---------------

ہندوستان سماچار / انظر حسن