نئی دہلی، 20 جنوری (ہ س)۔گھریلو صرافہ بازار میں حاضر چاندی نے آج زوردار چھلانگ لگائی ہے۔ آج کے اضافے کی وجہ سے یہ چمکدار دھات ملک بھر میں 3 لاکھ روپے فی کلو گرام کی سطح کو عبور کر گئی۔ اس کے ساتھ ہی اس چمکدار دھات نے آج مضبوطی کا نیا ریکارڈ بھی قائم کر دیا ہے۔ ملک کے الگ-الگ حصوں میں چاندی آج 8,100 روپے فی کلو گرام سے لے کر 10,200 روپے فی کلو گرام تک مہنگی ہو گئی ہے۔ قیمتوں میں اس اضافے کی وجہ سے ملک کے مختلف صرافہ بازاروں میں آج چاندی 3,04,900 روپے فی کلو گرام سے لے کر 3,18,100 روپے فی کلو گرام تک فروخت ہو رہی ہے۔

دہلی کے صرافہ بازار میں آج چاندی نے 10,200 روپے فی کلوگرام کی چھلانگ لگائی ہے، جس کی وجہ سے یہ چمکدار دھات تین لاکھ روپے فی کلوگرام کے نشان کو عبور کر 305,100 روپے فی کلوگرام کی سطح پر کاروبار کر رہی ہے۔ اسی طرح ممبئی، احمد آباد اور کولکاتا میں چاندی304,900 روپے فی کلوگرام کی سطح پر کاروبار کر رہی ہے۔ جے پور، سورت اور پونے میں چاندی 305,200 روپے فی کلوگرام کی سطح پر برقرار ہے۔

بنگلورو میں چاندی305,400 روپے فی کلوگرام اور پٹنہ اور بھونیشور میں 305,000 روپے فی کلوگرام پر ٹریڈ کر رہی ہے۔ اس کے علاوہ ، حیدرآباد میں چاندی 8,100 روپے کے اضافے کے ساتھ 317,800 روپے فی کلوگرام پر تجارت کر رہی ہے۔ ملک میں چاندی کی سب سے زیادہ قیمت چنئی میںہے، جہاں یہ چمکدار دھات 8,100 روپے فی کلوگرام بڑھ کر 318,100 رپے فی کلوگرام ہو گئی۔

ماہرین کا کہنا ہے کہ بین الاقوامی مارکیٹ میں چاندی کی قیمت چھلانگ لگاکر فی اونس قیمت 93.83 ڈالر تک پہنچ گئی ہے۔ بین الاقوامی مارکیٹ سے لے کر مقامی گھریلومارکیٹ تک، اس چمکدار دھات میں سرمایہ کاری کے حوالے سے مثبت جذبات قائم ہوئے ہیں۔ عالمی سطح پر مچی ہلچل کی وجہ سے بڑے سرمایہ کاروں نے سیف انسٹرومنٹ کے طور پر سونے اور چاندی میں اپنی سرمایہ کاری میں اضافہ کیا ہے۔ چاندی کی صنعتی مانگ میں بھی مزید اضافہ متوقع ہے۔ اس کے نتیجے میں، چاندی کی قیمتوں میں مزید تیزی جاری رہنے کی توقع ہے۔

کیپیکس گولڈ اینڈ انویسٹمنٹ کے سی ای او راجیو دتہ کا کہنا ہے کہ سونے اور چاندی کی قیمتوں پر سب سے زیادہ اثر امریکی صدر ڈونلڈ ٹرمپ کی جانب سے گرین لینڈ کے معاملے کے حوالے سے یورپی ممالک پر اضافی 10 فیصد ٹیرف عائد کرنے کے اعلان سے پڑا ہے۔ ٹرمپ نے ان یورپی ممالک پر محصولات عائد کرنے کی دھمکی دی ہے جنہوں نے گرین لینڈ پر امریکی کنٹرول کی مخالفت کی ہے ۔ امریکی صدر نے کہا ہے کہ یکم فروری 2026 سے ڈنمارک، ناروے، سویڈن، فرانس، جرمنی، برطانیہ، ہالینڈ اور فن لینڈ سے امریکا آنے والی اشیا پر 10 فیصد ٹیرف عائد کیا جائے گا۔ امریکی صدر ڈونلڈ ٹرمپ نے خبردار کیا ہے کہ اگر جون تک کوئی معاہدہ نہ ہوا تو گرین لینڈ تنازع کے حوالے سے یورپی ممالک پر 25 فیصد تک اضافی محصولات عائد کیے جا سکتے ہیں۔

ڈونلڈ ٹرمپ کے انتباہ کے بعد، یورپی یونین (ای یو) کے ارکان پارلیمان امریکہ کے ساتھ یورپی یونین کے تجارتی معاہدے کی منظوری کو روکنے کی تیاری کر رہے ہیں۔ ٹرمپ کی دھمکی کے بعد تناو¿ بڑھنے سے سرمایہ کاروں نے محفوظ اثاثے سمجھے جانے والے سونے اور چاندی میں اپنی سرمایہ کاری بڑھا دی ہے۔ اس کے نتیجے میں، ان دو چمکدار دھاتوں کی قیمتیں بین الاقوامی مارکیٹ اور مقامی صرافہ بازار، دونوں میں بڑھی ہیں۔

ہندوستھان سماچار

ہندوستان سماچار / محمد شہزاد