دھرم شالہ، 2 جنوری (ہ س)۔ دھرم شالہ میں ایک کالج کی طالبہ کی مشتبہ حالات میں موت نے پوری ریاست کو ہلا کر رکھ دیا ہے۔ رپورٹس کے مطابق طالبہ کو پروفیسر کی جانب سے طویل عرصے سے نسلی امتیاز اور بدسلوکی اور ذہنی اذیت کا نشانہ بنایا گیا تھا، جس کی وجہ سے وہ شدید ذہنی دباؤ کا شکار ہوگئی اور لدھیانہ کے ایک نجی اسپتال میں دوران علاج اس کی موت ہوگئی۔ خاتون نے خود اپنی موت کی کہانی بیان کی جب وہ نازک حالت میں تھی اور اپنی آخری سانسیں لے رہی تھی۔ جب اس سے پوچھ گچھ کی گئی تو اس نے نسلی تذلیل، ہراساں کیے جانے اور ذہنی اذیت کی پوری داستان بیان کیا۔ اس وقت ریکارڈ کیا گیا اس کا بیان اب وائرل ہوگیا ہے اور پوری کمیونٹی کو چونکا دیا ہے۔

اطلاعات کے مطابق طالبہ اور اس کے اہل خانہ نے اس سنگین معاملے کی اطلاع پولیس کو پہلے ہی دے دی تھی لیکن حیران کن اور تشویشناک بات یہ ہے کہ تقریباً ایک ماہ گزر جانے کے باوجود کوئی ایف آئی آر درج نہیں کی گئی۔ تاہم اب پولیس نے متوفی لڑکی کے والد کی شکایت پر مختلف دفعات کے تحت ایف آئی آر درج کر لی ہے۔ شکایت میں ایک پروفیسر سمیت چار طالب علموں کے خلاف ریگنگ اور جنسی ہراسانی کا الزام لگایا گیا ہے۔

یہ معاملہ صرف ایک طالبہ کی موت تک محدود نہیں ہے، بلکہ یہ نظام تعلیم، نسلی مساوات، استاد اور طالب علم کے تعلقات اور نظام انصاف پر ایک گہرا اور شرمناک الزام بن گیا ہے۔ طالبہ کا آخری بیان آج بھی انصاف کا متقاضی ہے۔

پولیس شکایت میں والد نے بتایا کہ ان کی بیٹی ڈگری کالج میں دوسرے سال کی طالبہ تھی۔ الزام ہے کہ 18 ستمبر کو کالج کی طالبات ہرشیتا، اکریتی اور کومولیکا نے ان کی بیٹی پر حملہ کیا اور اسے سنگین نتائج کی دھمکیاں دیں۔ اس واقعے کے بعد وہ ڈپریشن میں چلی گئیں اور بعد میں اس کی موت ہوگئی۔ ان کا مزید کہنا تھا کہ واقعے میں ایک کالج ٹیچر بھی ملوث تھا۔

ایس ایس پی کانگڑا اشوک رتنا نے بتایا کہ دھرم شالہ پولیس اسٹیشن میں بی این ایس اور اینٹی ریگنگ ایکٹ کے تحت ایف آئی آر درج کی گئی ہے۔ معاملہ زیر تفتیش ہے۔ ملزمان سے بھی پوچھ گچھ کی جائے گی۔

---------------

ہندوستان سماچار / عبدالسلام صدیقی