عارضی ملازمین نے ایک بار پھر حکومت سے مستقلی کا مطالبہ دوہرایا

جموں، 17 جنوری (ہ س)۔ ضلع ڈوڈہ میں پی ایچ ای ایمپلائز یونائیٹڈ فرنٹ کے زیرِ اہتمام ایک پروگرام منعقد کیا گیا، جس میں محکمہ پی ایچ ای سے وابستہ تینوں اضلاع کے عارضی ملازمین نے بڑی تعداد میں شرکت کی۔ پروگرام سے قبل فرنٹ کے ریاستی صدر روی ہنس کی قیادت میں ایک احتجاجی ریلی نکالی گئی، جس کے دوران مظاہرین نے حکومت کے خلاف نعرے بازی کرتے ہوئے اپنے دیرینہ مطالبات کو اجاگر کیا۔

اس موقع پر روی ہنس نے کہا کہ عارضی ملازمین گزشتہ کئی برسوں سے اپنی مستقلی کے لیے جدوجہد کر رہے ہیں، مگر ہر بار انہیں محض جھوٹے وعدوں کے ذریعے ٹالا گیا، جس کے باعث نہ صرف ان کے مسائل جوں کے توں ہیں بلکہ ان کے بچوں کا مستقبل بھی غیر یقینی کا شکار ہو چکا ہے۔

انہوں نے مزید کہا کہ عمر عبداللہ حکومت نے گزشتہ بجٹ اجلاس کے دوران عارضی ملازمین کے مسائل کے حل کے لیے ایک کمیٹی تشکیل دینے کا اعلان کیا تھا، تاہم تاحال اس حوالے سے کوئی ٹھوس پیش رفت سامنے نہیں آئی۔ روی ہنس نے واضح کیا کہ اگر آئندہ ماہ ہونے والے بجٹ سیشن میں حکومت نے عارضی ملازمین کے حق میں کوئی حتمی فیصلہ نہیں لیا تو پی ایچ ای ایمپلائز یونائیٹڈ فرنٹ تمام اراکینِ اسمبلی کے گھروں کا گھیراؤ کرنے پر مجبور ہوگا۔

ہندوستھان سماچار

---------------

ہندوستان سماچار / محمد اصغر