جموں, 15 جنوری (ہ س)۔ پونچھ پولیس نے دہشت گردی کے خلاف جاری سخت کارروائیوں کے تحت عدالت کے احکامات پر عمل کرتے ہوئے پاکستان میں مقیم ایک دہشت گرد ہینڈلر کی غیر منقولہ جائیداد ضبط کر لی ہے۔ یہ اقدام دہشت گردی کے مالی و لاجسٹک ڈھانچے کو کمزور کرنے کی حکمتِ عملی کا حصہ ہے۔سرکاری ذرائع کے مطابق یہ کارروائی ایف آئی آر نمبر 07/2002 کے تحت پولیس اسٹیشن منڈی میں درج مقدمہ کے سلسلے میں کی گئی، جو دشمن و غیر منقولہ جائیداد ایکٹ کی دفعات 2/3 کے تحت درج ہے۔ ضبط کی گئی جائیداد 10 کنال 14 مرلہ اراضی پر مشتمل ہے، جو تحصیل منڈی ضلع پونچھ میں واقع ہے، جس کی مجموعی مالیت تقریباً 22.05 لاکھ روپے بتائی گئی ہے۔

یہ جائیداد عبدالعزیز ولد احمدہ لون، سکنہ چیمبر کناری، تحصیل منڈی ضلع پونچھ کی بتائی جا رہی ہے، جو پاکستان میں مقیم ہو کر دہشت گرد ہینڈلر کے طور پر سرگرم ہے۔ ذرائع کے مطابق ملزم ماضی میں پاکستان مقبوضہ کشمیر فرار ہو چکا ہے اور وہاں سے بھارت کی سلامتی اور خودمختاری کے خلاف سرگرمیوں میں ملوث رہا ہے۔عدالتی کارروائی سے مسلسل فرار کی بنا پر متعلقہ عدالت نے ملزم کو مفرور مجرم قرار دیا تھا۔ پونچھ پولیس کی جانب سے گرفتاری کے لیے کی جانے والی متعدد کوششوں کے باوجود ملزم قانون کی گرفت میں نہ آ سکا، جس کے بعد عدالت نے اس کی غیر منقولہ جائیداد ضبط کرنے کے احکامات صادر کیے۔

عدالتی ہدایات پر عمل کرتے ہوئے پونچھ پولیس نے محکمہ مال کے ساتھ قریبی تال میل کے ذریعے تمام قانونی تقاضوں کو پورا کرتے ہوئے جائیداد کی ضبطی عمل میں لائی۔ضلع پولیس پونچھ کا کہنا ہے کہ یہ کارروائی دہشت گردی کی مالی معاونت اور نیٹ ورک کو ختم کرنے کی مسلسل مہم کا حصہ ہے۔ پولیس نے اس عزم کا اعادہ کیا کہ پاکستان میں مقیم دہشت گرد ہینڈلرز اور ملک دشمن سرگرمیوں میں ملوث عناصر کے خلاف قانون کے دائرے میں رہتے ہوئے سخت کارروائیاں آئندہ بھی جاری رہیں گی، تاکہ خطے میں امن و امان، عوامی سلامتی اور قومی خودمختاری کو یقینی بنایا جا سکے۔

ہندوستھان سماچار

---------------

ہندوستان سماچار / محمد اصغر