ممبئی، 15 جنوری (ہ س) ممبئی میں بریہن ممبئی میونسپل کارپوریشن کے انتخابات کے دوران ووٹنگ کے ابتدائی اوقات میں پولنگ بوتھس پر بدنظمی دیکھنے میں آئی، جہاں ووٹر ریکارڈ میں فرق اور ووٹنگ سلپس کی عدم موجودگی کے باعث کئی ووٹروں کو مشکلات کا سامنا کرنا پڑا، اور بعض افراد بغیر ووٹ ڈالے ہی واپس چلے گئے۔

متعدد ووٹروں نے بتایا کہ آن لائن ووٹر فہرست میں درج تفصیلات پولنگ بوتھس پر دستیاب ریکارڈ سے مختلف تھیں۔ ایک ووٹر کے مطابق، وہ کافی دیر تک قطار میں کھڑا رہا، لیکن ووٹر نمبر کے تضاد کے باعث اسے ووٹ ڈالنے کا موقع نہیں ملا اور اسے واپس لوٹنا پڑا۔

معروف فلم ساز اویناش گوواریکر نے بھی پولنگ کے دوران پیش آنے والی مشکلات کی نشاندہی کی۔ ان کا کہنا تھا کہ اگرچہ وہ ووٹ ڈالنے میں کامیاب رہے، لیکن ووٹنگ سلپس کی عدم دستیابی نے پورے عمل کو سست کر دیا۔ ووٹروں کو اپنے ووٹر نمبر کاغذی فہرستوں میں تلاش کرنا پڑ رہا تھا، جس سے ہر ووٹ میں غیر معمولی وقت لگ رہا تھا۔

گوواریکر کے مطابق پولنگ مراکز پر بنیادی سہولیات مناسب تھیں، مگر ووٹنگ سلپس نہ ہونے کے سبب قطاریں طویل ہو گئیں اور کئی ووٹر تاخیر سے دل برداشتہ ہو کر واپس چلے گئے۔ ان کا کہنا تھا کہ اس سال ووٹنگ سلپس کی تقسیم نہ ہونا اس الجھن کی بڑی وجہ بنا۔

ہندوستھان سماچار

--------------------

ہندوستان سماچار / جاوید این اے