ممبئی، 15 جنوری (ہ س)۔ ممبئی میں بریہن ممبئی میونسپل کارپوریشن انتخابات کے لیے جمعرات کو ووٹنگ کا آغاز صبح 7.30 بجے ہوا، مگر ووٹنگ کے پہلے ہی دن مہاراشٹر اسٹیٹ الیکشن کمیشن کی ویب سائٹ میں خرابی کے باعث ووٹروں کو مشکلات کا سامنا کرنا پڑا۔ شہر کے 227 وارڈز میں ابتدائی طور پر قطاریں تو دیکھی گئیں، مگر آن لائن سہولیات متاثر ہونے سے ووٹنگ کا عمل سست پڑ گیا۔
کئی ووٹروں نے بتایا کہ الیکشن کمیشن کی ویب سائٹ کھل ہی نہیں رہی تھی، جس کے سبب وہ ووٹر لسٹ میں اپنا نام دیکھنے اور پولنگ سلپ حاصل کرنے سے قاصر رہے۔ ویب سائٹ پر ڈیٹا دستیاب نہ ہونے کے پیغامات سامنے آئے، جس کے باعث پولنگ اسٹیشنوں کے باہر موجود ہیلپ ڈیسک پر بھی غیر یقینی صورتحال پیدا ہوئی۔
متعدد ووٹرز نے کہا کہ اگرچہ ان کے نام ووٹر لسٹ میں درج تھے، لیکن آن لائن رسائی نہ ہونے کی وجہ سے انہیں پولنگ بوتھس پر رکھی گئی کاغذی فہرستوں میں اپنا نام تلاش کرنا پڑا۔ اس عمل میں وقت لگا اور کئی ووٹروں کو بوتھ کے مقام میں تبدیلی یا پولنگ مراکز کے انضمام کے سبب مزید دشواری کا سامنا کرنا پڑا۔
یہ معاملہ سوشل میڈیا پر بھی زیر بحث رہا، جہاں شہریوں اور سیاسی رہنماؤں نے انتخابی انتظامات پر سوال اٹھائے۔ این سی پی کے شرد پوار دھڑے کے قومی ترجمان انیش گاونڈے نے کہا کہ ویب سائٹ کی ناکامی کے باعث ووٹروں کو جسمانی ووٹر لسٹوں پر انحصار کرنا پڑا اور بعض گھروں کے افراد کو مختلف پولنگ اسٹیشن تفویض کیے گئے، جس سے مزید الجھن پیدا ہوئی۔
دیگر شہریوں نے بھی آن لائن شکایت کی کہ پولنگ سلپ نہ ہونے اور ووٹر لسٹ میں ابہام کے باعث کچھ ووٹروں کو انتظار کرنا پڑا یا انہیں دوبارہ معلومات حاصل کرنے کے لیے کہا گیا۔ صبح کے اوقات میں ووٹنگ کے دوران یہ صورتحال خاص طور پر نمایاں رہی۔
دریں اثنا، ریاستی حکومت نے ممبئی میں عام تعطیل کا اعلان کر رکھا ہے تاکہ ووٹر ٹرن آؤٹ میں اضافہ ہو سکے۔ انتخابی محکمے کے مطابق شہر بھر میں 10,000 سے زائد پولنگ اسٹیشن قائم کیے گئے ہیں اور 64,000 سے زیادہ اہلکار تعینات کیے گئے ہیں۔ امن و امان برقرار رکھنے کے لیے 28,000 سے زائد پولیس اہلکار موجود ہیں، جبکہ خواتین کے زیر انتظام پنک بوتھس اور خصوصی سہولیات بھی فراہم کی گئی ہیں۔ ووٹنگ شام 5.30 بجے تک جاری رہے گی، اس کے بعد ای وی ایم مشینیں محفوظ مراکز منتقل کی جائیں گی اور 16 جنوری کو صبح 10.00 بجے گنتی شروع ہو گی۔
ہندوستھان سماچار
--------------------
ہندوستان سماچار / جاوید این اے
