ممبئی، 15 جنوری (ہ س)۔ مہاراشٹر میں 29 میونسپل کارپوریشنوں کے انتخابات کے لیے جمعرات کو ووٹنگ کا سلسلہ جاری ہے، جہاں صبح 7.30 بجے سے پولنگ مراکز پر شہریوں کی بھیڑ نظر آ رہی ہے۔ اس جمہوری عمل میں فلمی صنعت کی کئی معروف شخصیات بھی حصہ لے رہی ہیں اور ووٹ ڈال کر عوام کو پیغام دے رہی ہیں۔
بالی وڈ اداکار اکشے کمار نے ممبئی کے گاندھی شکشن بھون میں واقع پولنگ مرکز پر جا کر ووٹ ڈالا۔ ووٹنگ کے بعد انہوں نے کہا کہ آج بی ایم سی انتخابات کا دن ہے اور ممبئی کے شہریوں کے لیے یہ موقع ہے کہ وہ اپنے مستقبل کا فیصلہ کریں۔ انہوں نے کہا کہ اگر ممبئی کا حقیقی ہیرو بننا ہے تو صرف مکالمے نہیں بلکہ ووٹ ڈالنا بھی ضروری ہے۔
اکشے کمار کے ہمراہ ان کی اہلیہ ٹونکل کھنہ بھی پولنگ اسٹیشن پہنچیں اور ووٹ ڈال کر شہری ذمہ داری نبھائی۔ ٹونکل کھنہ نے کہا کہ ووٹ دینا انسان کو اختیار اور طاقت کا احساس دلاتا ہے، اسی لیے وہ ہر انتخاب میں ووٹنگ کو اہم سمجھتی ہیں۔
پولنگ کے دوران ایک منظر اس وقت جذباتی ہو گیا جب ایک چھوٹی بچی اکشے کمار کے پاس پہنچی اور اپنے والد کے قرض میں ہونے کا ذکر کیا۔ سیکورٹی اہلکار نے بچی کو روکنے کی کوشش کی، مگر اکشے کمار نے اسے اپنا نمبر دینے کو کہا۔ بچی نے بعد میں ان کے پاؤں چھونے کی کوشش کی، جسے اداکار نے فوراً منع کر دیا۔
بی ایم سی انتخابات میں اداکارہ سانیا ملہوترا نے بھی پولنگ اسٹیشن جا کر ووٹ ڈالا اور جمہوری عمل میں حصہ لیا۔ انتخابات کے موقع پر فلمی شخصیات کی سرگرم شرکت نے عام ووٹروں کو بھی ووٹنگ کے لیے متحرک کیا ہے۔
ہندوستھان سماچار
--------------------
ہندوستان سماچار / جاوید این اے
