بریہن میونسپل کارپوریشن انتخابات : پولنگ کے پہلے گھنٹوں میں ووٹرز کی معقول شرکت ، چند ای وی ایم میں مسائلممبئی، 15 جنوری (ہ س)۔ ممبئی میں بریہن ممبئی میونسپل کارپوریشن انتخابات کے لیے ووٹنگ جمعرات کی صبح 7.30 بجے شروع ہوئی، جس کے ابتدائی دو گھنٹوں میں ووٹروں کی شرکت مستحکم رہی۔ انتخابی پولنگ کے آغاز کے ساتھ ہی شہر کے مختلف حصوں میں پولنگ بوتھس پر سیاسی رہنماؤں، معروف شخصیات اور عام ووٹروں کی موجودگی دیکھی گئی۔ بی ایم سی کی تمام 227 وارڈز میں ایک ہی مرحلے میں ووٹنگ ہو رہی ہے۔ حکام نے بتایا کہ جو بھی ووٹر شام 5.30 بجے تک پولنگ اسٹیشن پہنچ جائے گا، اسے ووٹ ڈالنے کا حق حاصل ہوگا۔
ابتدائی اوقات میں ووٹنگ کا عمل زیادہ تر بغیر کسی رکاوٹ کے جاری رہا۔ تاہم چند مقامات پر ای وی ایم سے متعلق تکنیکی مسائل رپورٹ ہوئے۔ لال باغ کے چِواڈا گلی علاقے میں ایک مشین عارضی طور پر خراب ہوئی تھی، جسے فوری طور پر درست کر لیا گیا، جبکہ دادَر کے بالمون ودیامندر میں پیش آنے والی خرابی بھی بروقت حل کر دی گئی۔
انتخابی انتظامیہ نے شہر بھر میں مجموعی طور پر 10,231 پولنگ بوتھس قائم کیے ہیں۔ ان میں 4,704 بوتھس سرکاری مقامات پر، 782 کوآپریٹو سوسائٹیز میں اور 5,125 نجی عمارتوں میں واقع ہیں، تاکہ ووٹروں کو سہولت فراہم کی جا سکے۔
پولنگ مراکز پر ووٹروں کی آسانی کے لیے پینے کے پانی، بیٹھنے کی جگہ، صاف بیت الخلاء، مناسب روشنی، ریمپس اور وہیل چیئرز کا انتظام کیا گیا ہے۔ اس کے ساتھ ہی ہر وارڈ میں ’پنک ساکھی‘ پولنگ بوتھ قائم کیا گیا ہے، جہاں مکمل طور پر خواتین عملہ، بشمول پولیس اور سیکورٹی اہلکار، تعینات ہے۔
ممبئی کے انتخابی حلقے میں کل 1,03,44,315 ووٹرز شامل ہیں، جن میں 55,16,707 مرد، 48,26,509 خواتین اور 1,099 دیگر زمرے کے ووٹر ہیں۔ انتخابی حکام نے بتایا کہ 1.68 لاکھ ووٹروں کے ناموں میں دہراؤ پایا گیا تھا، جن میں سے 48,628 ووٹروں نے اینکسچر 2 کے ذریعے یہ واضح کر دیا ہے کہ وہ کس وارڈ میں ووٹ ڈالیں گے۔
انتخابی محکمہ کے مطابق پورے دن پولنگ کے عمل کی مسلسل نگرانی کی جا رہی ہے تاکہ شہر میں آزادانہ، منصفانہ اور شفاف ووٹنگ کو یقینی بنایا جا سکے۔
ہندوستھان سماچار
--------------------
ہندوستان سماچار / جاوید این اے
