نئی دہلی، 8 دسمبر (ہ س)۔ دہلی پولیس کی کرائم برانچ نے پنجاب کے منڈی گووند گڑھ سے بدنام زمانہ باوریا گینگ کے رکن سنجے عرف جھلو کو گرفتار کیا ہے۔ ملزم 34مقدمات میں مطلوب ہے جن میں سے چھ میں اسے مفرور قرار دیا جا چکا ہے۔ پانچ دیگر مقدمات میں غیر ضمانتی وارنٹ جاری کیے گئے ہیں۔

پولیس افسر کے مطابق ملزم 12 سے زائد مقدمات میں مطلوب تھا۔ اتر پردیش پولیس نے اس کی گرفتاری پر انعام کا اعلان بھی کیا تھا۔

کرائم برانچ کے ڈپٹی کمشنر آف پولیس ہرش اندورا نے پیر کو بتایا کہ کرائم برانچ کی ٹیم کو خفیہ اطلاع ملی کہ ملزم پنجاب کے منڈی گووند گڑھ علاقے میں چھپا ہوا ہے۔ دو ہفتوں کی مسلسل تکنیکی نگرانی اور مقامی معلومات جمع کرنے کے بعد، پولیس نے 7 دسمبر کو ملزم کے مقام پر چھاپہ مارا اور اسے گرفتار کر لیا۔

ڈپٹی کمشنر آف پولیس نے بتایا کہ سنجے عرف جھلو کے خلاف دہلی اور اتر پردیش میں کل 34 مقدمات درج ہیں جن میں قتل کی کوشش، ڈکیتی، چوری، اسنیچنگ اور اسلحہ ایکٹ شامل ہیں۔ ان میں سے 18 معاملے دہلی میں ہیں، جب کہ 16 اتر پردیش اور دیگر ریاستوں میں ہیں۔ اسے دہلی کے کئی تھانوں نے مفرور قرار دیا ہے، جن میں ساکیت، حوض خاص، مہرولی، آدرش نگر اور وزیر آباد شامل ہیں۔

دوران تفتیش ملزم نے انکشاف کیا کہ اس نے چھٹی جماعت تک تعلیم حاصل کی اور پھر موٹر سائیکل ٹھیک کرنا سیکھا۔ مالی مشکلات کی وجہ سے وہ گاؤں اور گردونواح میں دیگر نوجوانوں کے ساتھ چھینا جھپٹی اور ڈکیتی کی وارداتوں میں ملوث ہو گیا۔ 2019 اور 2022 کے درمیان اسے اتر پردیش اور دہلی پولیس نے کئی بار گرفتار کیا تھا۔ تاہم، جب بھی وہ جیل سے رہا ہوا، وہ جرائم میں واپس آیا اور عدالت میں پیش ہونے میں ناکام رہا۔

پولیس کے مطابق ملزمان اتر پردیش، ہریانہ، پنجاب اور جنوبی ہندوستان کے کئی علاقوں میں جگہ بدل کر جرائم کرتے تھے۔

---------------

ہندوستان سماچار / عبدالسلام صدیقی