جموں, 8 دسمبر (ہ س)جموں و کشمیر کے پہاڑی ضلع ڈوڈہ میں پولیس نے بھالڑہ کے جنگلی علاقے میں تلاشی آپریشن کے دوران اسلحہ و گولہ بارود برآمد کر کے ایک اہم کامیابی حاصل کی ہے۔ یہ کارروائی اسپیشل آپریشن گروپ نے ایس ایس پی ڈوڈہ سندیپ مہتا کی نگرانی میں پولیس اسٹیشن ٹھاٹھری کی حدود میں انجام دی۔

پولیس کے مطابق مصدقہ خفیہ اطلاع ملنے پر ایس او جی کی ٹیم نے جنگلاتی علاقے میں سرچ آپریشن شروع کیا، جس کے دوران ایک ایس ایل آر رائفل، دو میگزین اور بائیس زندہ کارتوس برآمد ہوئے۔

اسلحہ و گولہ بارود کی یہ برآمدگی ضلع میں سیکورٹی ڈھانچے کو مضبوط بنانے اور کسی ممکنہ تخریبی سرگرمی کو ناکام بنانے کی سمت ایک اہم قدم قرار دی جا رہی ہے۔ پولیس کا کہنا ہے کہ ضلع میں امن و استحکام کو یقینی بنانے کے لیے سرچ آپریشنز مزید تیز کیے جائیں گے۔برآمد شدہ اسلحہ کے ماخذ اور اسے وہاں چھپانے میں ملوث عناصر کی نشاندہی کے لیے تحقیقات جاری ہیں۔

ہندوستھان سماچار

ہندوستان سماچار / محمد اصغر