نئی دہلی، 7 دسمبر (ہ س):۔

دہلی میں فضائی آلودگی پر قابو پانے کے لئے، وزیر اعلی ریکھا گپتا نے اتوار کو دارالحکومت کے مختلف رہائشی علاقوں میں رات کے چوکیداروں کو الیکٹرک ہیٹر تقسیم کئے۔ اس اقدام کا مقصد موسم سرما کے دوران کھلی آگ کی وجہ سے دھوئیں اور آلودگی کو کم کرنا ہے۔ وزیر اعلیٰ نے اعلان کیا کہ دہلی حکومت دارالحکومت کو صاف، محفوظ اور آلودگی سے پاک رکھنے کے لیے مستقبل میں بھی اسی طرح کے اقدامات کرتی رہے گی۔ انہوں نے یہ بھی کہا کہ الیکٹرک ہیٹر ایک محفوظ، صاف اور ماحول دوست آپشن ہیں، جو آلودگی سے نمٹنے میں ایک مو¿ثر معاون ہے۔ وزیر اعلیٰ کے مطابق حکومت آلودگی کو کم کرنے کے لیے مشن موڈ پر کام کر رہی ہے۔ الیکٹرک ہیٹر کی تقسیم ڈی ایس آئی آئی ایس ڈی کے سی ایس آر فنڈز کا استعمال کرتے ہوئے دہلی ہاٹ، پتم پورہ میں کی گئی۔

وزیر اعلیٰ نے ماحولیات اور صنعت کے وزیر منجندر سنگھ سرسا اور ڈی ایس آئی ڈی سی کا تقریب میں شرکت کے لیے شکریہ ادا کیا۔ وزیر اعلیٰ نے کہا کہ دارالحکومت میں سردیوں کے دوران کھلی آگ آلودگی کا ایک بڑا ذریعہ ہے جس سے ہوا میں دھوئیں کی ایک موٹی تہہ بن جاتی ہے۔ چوکیداروں کو فراہم کیے جانے والے الیکٹرک ہیٹر دھویں کو کنٹرول کرنے میں موثر کردار ادا کریں گے۔ وزیر اعلیٰ نے کہا کہ دہلی حکومت آلودگی کو کم کرنے کے لیے جنگی بنیادوں پر کام کر رہی ہے۔

تقریب سے خطاب کرتے ہوئے ماحولیات اور صنعت کے وزیر منجندر سنگھ سرسا نے کہا کہ وزیر اعلیٰ ریکھا گپتا کی قیادت میں دہلی آلودگی کے خلاف ایک مضبوط جنگ لڑ رہی ہے۔ انہوں نے کہا کہ اس سال دہلی میں گاڑیوں کی تعداد میں تقریباً 10 فیصد اضافہ اور تعمیراتی سرگرمیوں میں 20 فیصد سے زیادہ اضافہ ہونے کے باوجود، شہر نے گزشتہ سالوں کے مقابلے ایئر کوالٹی انڈیکس میں مسلسل، نمایاں اور حوصلہ افزا بہتری ریکارڈ کی ہے۔ وزیر ماحولیات سرسا نے شہریوں، ٹھیکیداروں اور کمیونٹی گروپس سے اپیل کی کہ وہ ماحول دوست رویہ اپنائیں اور دہلی کو آلودگی سے پاک بنانے کے اس اجتماعی مشن میں فعال طور پر حصہ ڈالیں۔

ہندوستھان سماچار

ہندوستان سماچار / عطاءاللہ