جموں, 7 دسمبر (ہ س)۔

رامبن پولیس نے ایک بنگلادیشی خاتون کے خلاف غیر قانونی طور پر ہندوستان میں داخل ہونے اور بغیر ضروری سفری دستاویزات قیام کرنے پر امیگریشن اور فارنرز ایکٹ کے تحت مقدمہ درج کیا ہے۔

پولیس اسٹیشن چندرکوٹ کو موصولہ خفیہ اطلاع کے مطابق خاتون کی شناخت ہپّو اختر دختر ہارون رشید خان سکنہ بنگلادیش کے طور پر ہوئی، جو بغیر پاسپورٹ اور ویزا کے ہندوستان میں داخل ہوئی تھی۔ تصدیق کے دوران یہ بات سامنے آئی کہ مذکورہ خاتون گزشتہ چند روز سے تحصیل و ضلع رامبن کے چندرکوٹ کے کنفر علاقے میں مقیم تھی۔

ابتدائی پوچھ گچھ میں یہ بھی انکشاف ہوا کہ خاتون اپنی شناخت چھپانے کی کوشش کر رہی تھی، جس سے اس کی موجودگی کے محرکات پر سنجیدہ شبہات پیدا ہوئے۔ اس بنا پر پولیس نے ایف آئی آر نمبر 77/2025 امیگریشن اور فارنرز ایکٹ کی متعلقہ دفعات کے تحت پولیس اسٹیشن چندرکوٹ میں درج کر کے معاملے کی مزید تحقیقات شروع کر دی ہیں۔

رامبن پولیس نے عوام سے اپیل کی ہے کہ وہ غیر قانونی غیر ملکی افراد کو کسی بھی قسم کا رہائش، پناہ یا تعاون فراہم نہ کریں۔ عوام کو ہدایت دی گئی ہے کہ کسی غیر ملکی کے ساتھ کسی بھی قسم کا معاہدہ یا شادی کرنے سے پہلے اس کی قانونی حیثیت کی تصدیق لازمی کریں، ورنہ قانونی کارروائی کا سامنا کرنا پڑ سکتا ہے۔پولیس نے واضح کیا کہ ضلع میں داخلی سلامتی کو یقینی بنانے اور امیگریشن قوانین پر سختی سے عمل درآمد کرانا ان کی اولین ترجیح ہے۔

ہندوستھان سماچار

---------------

ہندوستان سماچار / محمد اصغر