ڈرگس فروخت کرنے والا گروہ گرفتار، بڑی مقدار میں گانجہ اور براؤن شوگر ضبطحیدرآباد، 5 نومبر(ہ س)۔ حیدرآباد کے سیف آباد علاقے میں سنٹرل زون ٹاسک فورس نے ایک بڑی کارروائی انجام دیتے ہوئے آئی میکس کے قریب تین ڈرگ پَیڈلرز کو گرفتار کر لیا اور ان کے قبضے سے براؤن شوگر اور خشک گانجہ کی بھاری مقدار برآمد کی۔ اس کارروائی نے شہر میں منشیات کے نیٹ ورک سے نمٹنے کے لیے پولیس کی تیز کارروائی کو ایک بار پھر نمایاں کردیاہے۔ ٹاسک فورس نے گرفتار کیے گئے ملزمان کی شناخت محمد غلام جیلانی، سلیمان خان اور فیروز بن علی عرف ساحل کے نام سے کی۔ یہ تینوں رات کے اوقات میں مشکوک حالت میں گھومتے ہوئے پائے گئے اور منشیات کی خرید و فروخت میں ملوث تھے۔کارروائی کے دوران پولیس نے ان کے قبضے سے 100 گرام براؤن شوگر، 1350 گرام خشک گانجہ، سات موبائل فون اور ایک ہونڈا موٹر سائیکل (ٹی ایس 15 ای ایچ 4694) ضبط کی،جن کی مجموعی مالیت تقریباً 23 لاکھ 50 ہزار روپے بتائی گئی ہے۔ تحقیقات کے دوران فیروز بن علی عرف ساحل اور سلیمان خان نے اقبال جرم کیاکہ وہ باقا عدگی سے محمد غلام جیلانی سے فی گرام 5000 روپے کے حساب سے براؤن شوگرخریدتے تھے اور اسے نشہ کے عادی صارفین کو 8000 سے 10,000 روپے فی گرام فروخت کرتے تھے۔ اس طرح دونوں غیر قانونی منافع کماتےتھے۔

انہوں نے مزید بتایا کہ 4 نومبر 2025 کوانہوں نے 3 گرام براؤن شوگرایک شخص محمد احمد ساکن جہاں نما کو 24 ہزار روپے میں فروخت کی تھی۔ بعد میں یہ انکشاف ہواکہ محمداحمد اسی نشے کی زیادتی کے باعث کن ورتھ ٹاور–1، شیورام پلی کے ایک فلیٹ میں فوت ہو گیا۔ اس سلسلے میں راجندر نگر پولیس اسٹیشن نے کرائم نمبر 1205/2025 یو/ایس 194 بی این ایس ایس کے تحت مقدمہ درج کیا ہے اور مزید تحقیقات جاری ہیں۔مرکزی ملزم محمد غلام جیلانی نے بتایا کہ وہ جھارکھنڈ سے حیدرآباد منتقل ہوا تھا اور مالی مشکلات کے باعث منشیات کی خرید و فروخت میں شامل ہوا۔ تقریباً چار ماہ قبل اس کی ملاقات افسر نامی شخص سے مولا علی درگاہ پر ہوئی، جو اڈیشہ کے ڈرگ سپلائرز سے رابطے میں تھا۔ اسی کے ذریعے جیلانی کا منشیات کے سودے میں داخلہ ہوا۔ افسر کے مشورے پر جیلانی بھوبنیشور، کٹک، جگت سنگھ پور، جلیشور اور بالاسور (اڑیسہ) گیا جہاں انہوں نے 3.5 لاکھ روپے ادا کرکے 115 گرام براؤن شوگر اور 1350 گرام خشک گانجہ خریدا، جسے وہ 1 نومبر 2025 کو بس کے ذریعے حیدرآباد واپس لایا۔ بعد میں اس نے 15 گرام براؤن شوگر سلیمان اور فیروز کو فروخت کی اور انہیں ہدایت دی کہ فی گرام 8000 سے 10,000 روپے میں بیچ کر 2000 تا 3000 روپے فی گرام کمیشن گرفتار ڈرگ پَیڈلرز اور ضبط شدہ سامان کو مزید قانونی کارروائی کے لیے سیف آباد پولیس اسٹیشن کے حوالے کر دیا گیا۔ کارروائی سنٹرل زون ٹاسک فورس کے انسپکٹر، سب انسپکٹر اور ٹیم کے علاوہ سیف آباد پولیس نے مشترکہ طورپر انجام دی۔آخر میں یہ واضح کیا گیاکہ شہر میں منشیات کے پھیلاؤ کو روکنے کے لیے اس طرح کی کارروائیاں مستقبل میں بھی جاری رہیں گی اور پولیس ہر سطح پر سخت نگرانی کر رہی ہے۔

ہندوستھان سماچار

ہندوستان سماچار / محمدعبدالخالق