حیدرآباد ، 5 نومبر(ہ س)۔حیدرآباد کے پرانے شہر میں بھوانی نگر پولیس نے ایک بڑی کامیابی حاصل کرتے ہوئے ایک گھر میں ہونے والی سنسنی خیزڈکیتی کیس میں چارافراد کو گرفتار کرلیا،جو بی این ایس اورآرمز ایکٹ کے تحت درج مقدمہ میں ملوث تھے۔ پولیس کی اس فوری کارروائی کے نتیجے میں خطیررقم، موبائل فونز، دو پہیہ گاڑیاں اور واردات میں استعمال ہونے والا آلہ بھی برآمد کیاگیا۔اس کارروائی سے نہ صرف مقامی شہریوں کو بڑا ریلیف ملا بلکہ جنوبی زون کی کرائم ٹیموں کی کارکردگی ایک بار پھر نمایاں ہوئی۔پولیس کے مطابق برآمد شدہ سامان میں 34,66,000 روپے نقد، پانچ موبائل فون، پانچ دوپہیہ گاڑیاں، ایک تیزدھارچھری، ایک سویٹر اورایک مفلر شامل ہیں۔ یہ تمام اشیاء ملزمین سے ضبط کی گئیں،جبکہ ایک موبائل فون شکایت گزار سے حاصل کیا گیاتھا۔گرفتار شدہ ملزمین کی شناخت اس طرح کی گئی ہے:

A1 سیدعرفان، پیشہ کارڈرائیور،ساکن بھوانی نگر

A2 مدثر الٰہی عرف ساحل، پیشہ رائیڈنگ سروس ڈرائیور،

A3 محمد زاہد، پیشہ چوڑیوں کاکاروبار،

A4 محمد عبد الرحمن، پیشہ فرنیچر ورک، ساکن میلاردیو پلی

چاروں ملزمین پر عیاشی کی زندگی اور مالی بدحالی کے باعث غلط راستہ اختیار کرنے کا شبہ ظاہر کیا گیا۔ پولیس کے مطابق یہی عوامل انہیں ڈکیتی کی طرف لے گئے۔اس واردات کا ماسٹرمائنڈمحمدزاہدتھا،جو شکایت گزار کا قریبی جاننے والا تھا۔اسے معلوم ہوا کہ شکایت گزار گھر خریدنے کی غرض سے 40 لاکھ روپے رکھتا ہے، جس کے بعداس نے اپنے ساتھیوں کے ساتھ مل کر منصوبہ تیارکیا۔واردات 30 نومبر 2025 کو صبح تقریباً6:30 بجے شکایت گزار کے گھر میں پیش آئی۔تین ملزمین—سید عرفان، مدثر الٰہی اور محمد زاہد—نقاب پہن کرگھر میں داخل ہوئے۔ انہوں نے شکایت گزار پرچاقو کے دستے سے حملہ کیا،اس کے ہاتھ باندھ دیے اورپھر 40 لاکھ روپے نقد،ایک موبائل فون اور برگیمن گاڑی لے کر فرار ہوگئے۔رقم کی تقسیم اس طرح ہوئی:

A1 کے حصے میں 1,50,000 روپے آئے

A2 کے حصے میں 5,000 روپے

A3 نے 34,66,000 روپے اپنے پاس رکھے

A4 کو 3,90,000 روپے رقم چھپانے کے لیے دیے گئے

پولیس نے بڑی مہارت سے کارروائی کرتے ہوئے مجموعی طور پر 34,66,000 روپے واپس برآمد کر لیے۔اس معاملے میں مقدمہ Cr.No.182/2025 U/S 309(6), 333, 317 R/W 3(5) BNS & Sec 25(1)(B) Arms Act کے تحت درج کیا گیا۔اس کامیاب کارروائی کی نگرانی آئی پی ایس افسر کھری کرن پربھاکر، ڈی سی پی ساوتھ زون نے کی۔ اس کے علاوہ ساوتھ زون ٹاسک فورس ٹیمیں، میر چوک ڈویژن کے اے سی پی جی. سندر، بھوانی نگر پولیس اسٹیشن کے ایس ایچ او ایم بالا سواتی اور رین بازار، میر چوک اوربھوانی نگرکی کرائم ٹیموں نے بھی حصہ لیا۔ سب انسپکٹر نوین، مہیش، سامی اور دیگر اہلکار بھی اس کارروائی کا حصہ رہے۔پولیس نے اعلان کیاہے کہ کیس کو حل کرنے والے تمام افسران کو مناسب انعام دیا جائے گا۔چاروں ملزمین کی گرفتاری اور خطیر رقم کی بازیابی سے بھوانی نگر پولیس کی تیز رفتار کارروائی اور مؤثر حکمتِ عملی ثابت ہوتی ہے۔ اس اقدام سے شہریوں میں اطمینان کی فضا قائم ہوئی اور قانون نافذ کرنے والے اداروں پر اعتماد مزید مضبوط ہوا۔

ہندوستھان سماچار

ہندوستان سماچار / محمدعبدالخالق