جموں, 31 دسمبر (ہ س)کرائم برانچ جموں نے سال 2025 کے دوران سنگین اور پیچیدہ اقتصادی جرائم کے خلاف مؤثر کارروائی کرتے ہوئے 67 ایف آئی آر درج کیں جبکہ 22 ملزمان کو گرفتار کیا گیا۔اس کارکردگی کو ادارے کی ایک تاریخی کامیابی قرار دیا گیا ہے۔پولیس ترجمان کے مطابق، کرائم برانچ جموں کے اکنامک آفنسز وِنگ نے سال کے دوران اقتصادی جرائم سے متعلق ریکارڈ تعداد میں مقدمات کو منطقی انجام تک پہنچایا۔ اس دوران 1,186 شکایات کا ازالہ کیا گیا اور 67 نئے مقدمات درج کیے گئے، جو گزشتہ 25 برسوں میں سب سے زیادہ ہیں۔

انہوں نے بتایا کہ چارج شیٹ کیے گئے معاملات کی مجموعی مالی مالیت تقریباً 20 کروڑ روپے رہی۔ سال بھر میں ای او ڈبلیو جموں کی مختلف ٹیموں نے جموں و کشمیر کے اندر اور باہر کارروائیاں انجام دیتے ہوئے مختلف مقدمات میں ملوث 22 ملزمان کو گرفتار کیا۔

ترجمان نے کہا کہ ان مقدمات کی تفتیش کے لیے دستاویزی اور ڈیجیٹل شواہد کی باریک بینی سے جانچ، تفصیلی تجزیہ اور مختلف سرکاری محکموں، بینکوں اور مالیاتی اداروں کے ساتھ مسلسل تال میل ضروری رہا۔انہوں نے مزید بتایا کہ کرائم برانچ جموں نے اراضی فراڈ، ہائی پروفائل مقدمات، جعل سازی، دھوکہ دہی، ویزا فراڈ، سرکاری رقومات کی خردبرد اور سرکاری عہدوں کے غلط استعمال سے متعلق متعدد معاملات کی تفتیش کی، جبکہ جموں زون میں سرگرم غیر قانونی جاب کنسلٹنسیوں پر خصوصی توجہ دی گئی۔

ترجمان کے مطابق، سال 2025 کے دوران منظم لینڈ بروکر نیٹ ورکس، عادی مجرموں اور پیشہ ور دھوکہ بازوں کی نشاندہی کر کے ان کے خلاف کارروائی عمل میں لائی گئی، جس سے اقتصادی جرائم میں ملوث عناصر کے لیے سخت پیغام گیا۔انہوں نے بتایا کہ ای او ڈبلیو جموں کے فوٹو سیکشنز نے بھی قابلِ ستائش کارکردگی کا مظاہرہ کرتے ہوئے مختلف اضلاع میں 3,599 کرائم سینز کی جامع فوٹوگرافک کوریج فراہم کی، جو جموں زون کے مختلف تھانوں میں درج مقدمات کا حصہ ہیں۔

ہندوستھان سماچار

ہندوستان سماچار / محمد اصغر