علی گڑھ، 31 دسمبر (ہ س)۔

ذاکر حسین کالج آف انجینئرنگ اینڈ ٹکنالوجی، علی گڑھ مسلم یونیورسٹی کے شعبہ اپلائیڈ کیمسٹری کی ریسرچ اسکالر مس بصری کو نوبل انعام یافتگان کے ہمراہ باوقار سترہویں ہوپ میٹنگ 2026میں شرکت کے لیے منتخب کیا گیا ہے جو 2 سے 6 مارچ 2026 تک جاپان کے سوکوبا میں منعقد ہوگی۔ مس بصری، ڈاکٹر مشیر احمد کی نگرانی میں پی ایچ ڈی کر رہی ہیں۔انھیں حکومت ہند کے محکمہ سائنس وٹکنالوجی نے نامزد کیا تھا، جس کے بعد جاپان سوسائٹی فار دی پروموشن آف سائنس (جے ایس پی ایس) نے انہیں اس عالمی شہرت یافتہ سائنسی فورم میں ہندوستان کی نمائندگی کے لیے منتخب کیا۔ ہوپ میٹنگ میں دنیا بھر سے نوبل انعام یافتہ سائنس داں اور ممتاز نوجوان محققین انٹرڈسپلینری مکالمے کو فروغ دینے اور جدید سائنسی ترقیات پر غور وخوض کے لئے جمع ہوتے ہیں۔

محکمہ سائنس وٹکنالوجی مس بصری کے بین الاقوامی سفر کے اخراجات برداشت کرے گا، جبکہ جاپان میں قیام سمیت مقامی اخراجات جے ایس پی ایس کے ذمے ہوں گے، جو اُن کی تحقیقی صلاحیتوں اور عالمی سطح پر اعتراف کی عکاسی کرتا ہے۔ مس بصری کی تحقیق میٹل آرگینک فریم ورکس کی تیاری اور ان کے اطلاق سے متعلق ہے، جو سینسنگ، ماحولیاتی تطہیر اور توانائی کے ذخیرے جیسے شعبوں میں استعمال ہوتے ہیں۔ ان کے9 تحقیقی مضامین شائع ہوچکے ہیں۔ ان کی تحقیق رائل سوسائٹی آف کیمسٹری کے معروف جریدے کیمیکل کمیونیکیشنز میں بھی شائع ہوئی ہے۔ اس کے علاوہ ایک اینٹی کینسر مرکب اور اس کی تیاری کے عمل سے متعلق پیٹنٹ بھی انھیں ملا ہوا ہے اور تین بین الاقوامی اور دو قومی کانفرنسوں میں وہ اپنی تحقیق پیش کر چکی ہیں۔ 17ویں ہوپ میٹنگ کے لیے ان کا انتخاب شعبہ اپلائیڈ کیمسٹری کے لیے باعثِ فخر ہے اور یہ عالمی سطح پر تحقیقی سرگرمیوں میں اے ایم یو کی حصہ داری کو بھی اجاگر کرتا ہے۔ پورے ہندوستان سے اس باوقار پروگرام کے لئے منتخب ہونیو الے محض پانچ افراد میں سے وہ ایک ہیں۔

اے ایم یو کی وائس چانسلر پروفیسر نعیمہ خاتون نے مس بصری کو اس نمایاں دستیابی پر مبارکباد پیش کی اور نوبل انعام یافتہ سائنس دانوں کے ساتھ ہوپ میٹنگ 2026 میں ہندوستان کی نمائندگی کے لئے نیک تمناؤں کا اظہار کیا۔ شعبہ اپلائیڈ کیمسٹری کے چیئرپرسن پروفیسر رئیس احمد نے بھی انہیں مبارکباد پیش کی اور نیک خواہشات کا اظہار کیا۔

ہندوستھان سماچار

ہندوستان سماچار / سید کامران علی گڑھ