حیدرآباد، 23 دسمبر(ہ س)۔ آندھرا پردیش کے وزیر اعلیٰ این چندرابابو نائیڈو نے کہا ہے کہ موجودہ دور میں پوری دنیا کی نظریں کوانٹم ٹیکنالوجی پرلگی ہوئی ہے اورمستقبل میں امراوتی کوانٹم ویلی کے طور پرجدید تحقیق کاعالمی مرکز بنے گی ۔ ہزاروں ٹکنالوجی طلبہ کے ساتھ آن لائن منعقدہ کوانٹم ٹاک پروگرام سے خطاب کرتے ہوئے وزیر اعلیٰ نے کہا کہ کوانٹم کمپیوٹنگ آنے والے وقت میں زندگی کے ہر شعبہ میں انقلاب برپا کر دے گی۔ یہ پروگرام کیوبٹ اور وائسر جیسے اداروں کے اشتراک سے منعقد کیا گیا۔ اپنے خطاب کے دوران وزیر اعلیٰ نے معاشی تاریخ کا حوالہ دیتے ہوئے کہا کہ چین نے 1970 میں معاشی اصلاحات شروع کیں جبکہ ہندوستان میں یہ اصلاحات 1991 میں آئیں جس کے بعد ملک نے کبھی پیچھے مڑ کر نہیں دیکھا۔ انہوں نے کہا کہ سبز انقلاب نے ملک کی تقدیر بدل دی اور ہندوستان اناج کے معاملہ میں خود کفیل بن گیا۔ ریاست کی ترقی کے منصوبوں پر روشنی ڈالتے ہوئے انہوں نے بتایا کہ وشاکھاپٹنم میں بڑی تعداد میں آئی ٹی کمپنیاں آ رہی ہیں اور مستقبل میں یہ شہرنالج اکانومی اور ٹیکنالوجی کا اہم مرکز بنے گا۔ اس کے علاوہ انہوں نے تروپتی میں ایک اسپیس سٹی قائم کرنے کے منصوبہ کا بھی ذکر کیا تاکہ ریاست کو جدید ٹکنالوجی کے نقشہ پر نمایاں مقام دلایا جا سکے۔ انہوں نے مزید کہا کہ وزیراعظم مودی کی قیادت میں عام آدمی کی فلاح و بہبود اور بااختیار بنانے کے مقصد سے بڑی اصلاحات لائی جا رہی ہیں۔

ہندوستھان سماچار

ہندوستان سماچار / محمدعبدالخالق