جموں, 23 دسمبر (ہ س)۔ محکمہ قانون، انصاف و پارلیمانی امور نے انکشاف کیا ہے کہ جموں و کشمیر میں ایڈوکیٹ جنرل کا اہم عہدہ گزشتہ ایک سال سے زائد عرصے سے خالی ہے، جو سینئر ایڈوکیٹ ڈی سی رینا کے استعفیٰ کے بعد تاحال پُر نہیں کیا جا سکا۔

یہ بات جموں سے تعلق رکھنے والے سماجی کارکن رمن کمار شرما کی جانب سے دائر کی گئی آر ٹی آئی درخواست کے جواب میں سامنے آئی ہے۔ محکمے کے سینٹرل پبلک انفارمیشن آفیسر کے مطابق اب تک اس عہدے پر تقرری کے لیے کوئی تجویز پیش نہیں کی گئی اور نہ ہی اس سلسلے میں کوئی عملی قدم اٹھایا گیا ہے۔

آر ٹی آئی کے جواب میں کہا گیا ہے کہ ایڈوکیٹ جنرل کا عہدہ اس دن سے خالی پڑا ہے جب سابق ایڈوکیٹ جنرل نے اپنا استعفیٰ پیش کیا تھا۔ ڈی سی رینا نے اکتوبر گزشتہ سال اپنا استعفیٰ دیا تھا، جو نیشنل کانفرنس کی قیادت میں حکومت کے اقتدار سنبھالنے کے دو روز بعد پیش کیا گیا تھا۔ تاہم، ان کا استعفیٰ تاحال لیفٹیننٹ گورنر کی جانب سے قبول نہیں کیا گیا۔

محکمے کے مطابق ڈی سی رینا کے استعفیٰ سے متعلق معاملہ ابھی زیر غور ہے اور اس کی منظوری یا عدم منظوری کے حوالے سے کوئی باضابطہ فیصلہ یا اطلاع جاری نہیں کی گئی ہے۔ اسی بنا پر محکمہ نے استعفیٰ نامے کی مصدقہ نقل فراہم کرنے سے بھی انکار کیا ہے۔

واضح رہے کہ ڈی سی رینا کو سابق ریاست جموں و کشمیر میں تین مرتبہ ستمبر 2008، فروری 2016 اور جولائی 2018 ایڈوکیٹ جنرل مقرر کیا گیا تھا۔ استعفیٰ کے بعد حکومت نے ان کی خدمات کو جاری رکھنے پر بھی رضامندی ظاہر کی تھی۔

محکمے نے مزید واضح کیا ہے کہ نئے ایڈوکیٹ جنرل کی تقرری سے متعلق اب تک کوئی تجویز زیر غور نہیں ہے، اور جموں و کشمیر میں ایڈوکیٹ جنرل کی تقرری آئینِ ہند کے تحت مجاز اتھارٹی کی جانب سے عمل میں لائی جاتی ہے۔

ہندوستھان سماچار

ہندوستان سماچار / محمد اصغر