اپڈیٹ ۔۔جموں, 16 دسمبر (ہ س)۔ ضلع ادھمپور میں پیر کی شام دہشت گردوں اور سیکورٹی فورسز کے درمیان جاری تصادم کے دوران اسپیشل آپریشنز گروپ (ایس او جی) کے مزید دو اہلکار زخمی ہو گئے۔سرکاری ذرائع کے مطابق فائرنگ کے تبادلے کے دوران ایس او جی کے دو اور جوان زخمی ہوئے، جبکہ دہشت گردوں کے بھی زخمی ہونے کی اطلاعات ہیں۔ اس سے قبل اسی تصادم میں ایک ایس او جی اہلکار شدید زخمی حالت میں دم توڑ گیا تھا۔

یہ تصادم اس وقت شروع ہوا جب سیکورٹی فورسز نے دہشت گردوں کی موجودگی سے متعلق مخصوص خفیہ اطلاع کی بنیاد پر علاقے میں محاصرے اور تلاشی کی کارروائی شروع کی۔ کارروائی کے دوران دہشت گردوں کی جانب سے فائرنگ کی گئی، جس کے بعد شدید گولہ باری کا سلسلہ شروع ہو گیا۔

ذرائع نے بتایا کہ اس وقت فائرنگ رک گئی ہے تاہم پورے علاقے کو سخت سیکورٹی حصار میں لے لیا گیا ہے۔ دہشت گردوں کے ممکنہ فرار کے تمام راستے سیل کر دیے گئے ہیں تاکہ انہیں بے اثر کیا جا سکے۔

علاقے میں اضافی نفری تعینات کر دی گئی ہے اور تلاشی کارروائیاں بدستور جاری ہیں۔ مزید تفصیلات کا انتظار ہے۔

ہندوستھان سماچار

---------------

ہندوستان سماچار / محمد اصغر