بلیا، 9 نومبر (ہ س)۔ اتر پردیش کے بلیا ضلع کے منیار تھانہ علاقے میں سنیچر کی دیر رات شرپسندوں نے کلہاڑی کے وار سے ایک نوجوان کا بے دردی سے قتل کر دیا۔ پولیس نے موقع پر پہنچ کر لاش کو تحویل میں لے کر مزید تفتیش شروع کر دی ہے۔

بانسڈیہہ سرکل آفیسر جے شنکر نے اتوار کو بتایا کہ منیار تھانہ علاقہ کے محلی پور گاؤں کے رہنے والے چندن راج بھر (23) ولد گنیش راج بھر کو کل رات تقریباً 9 بجے کلہاڑی سے وار کر کے قتل کر دیا گیا۔ تحقیقات سے پتہ چلا کہ تین حملہ آور گھر سے کچھ فاصلے پر تاک میں پڑے تھے اور چندن کو دیکھتے ہی اس پر حملہ کر دیا۔ چیخ و پکار سن کر آس پاس کے لوگ جائے وقوعہ پر پہنچ گئے اور حملہ آور فرار ہو گئے۔ بری طرح زخمی چندن کو فوری طور پر نجی گاڑی میں ضلع اسپتال لایا گیا، جہاں علاج کے دوران اس کی موت ہوگئی۔

ایریا آفیسر جے شنکر نے بتایا کہ واقعہ کی اطلاع ملتے ہی پولیس فوراً پہنچی اور لاش کو اپنی تحویل میں لے لیا۔ تینوں ملزمان پڑوسی بتائے جاتے ہیں، حالانکہ قتل کی وجہ ابھی تک واضح نہیں ہوسکی ہے۔ تینوں نامزد ملزمان کے خلاف مقدمہ درج کرکے کارروائی کی جارہی ہے۔ کشیدگی کے پیش نظر گاؤں میں پولیس تعینات کر دی گئی ہے۔

---------------

ہندوستان سماچار / عبدالسلام صدیقی