جموں, 7 نومبر (ہ س) ۔
فوج کے ویسٹرن کمانڈر لیفٹیننٹ جنرل منوج کمار کٹیار نے جمعہ کے روز جموں۔پٹھانکوٹ سیکٹر کے سرحدی علاقوں میں تعینات فوجی دستوں کی آپریشنل تیاریوں کا جائزہ لیا۔ اس موقع پر انہوں نے مختلف حساس مقامات پر تعینات یونٹوں کے انتظامات، نگرانی نظام اور ہنگامی ردِعمل کے منصوبوں کا تفصیلی معائنہ کیا۔
ذرائع کے مطابق، لیفٹیننٹ جنرل کٹیار نے سردیوں کے دوران درپیش ممکنہ چیلنجز کے پیش نظر سیکورٹی اقدامات مزید مستحکم بنانے پر زور دیا تاکہ اونچے اور جنگلاتی علاقوں میں سرگرم دہشت گردوں کے کسی بھی عزائم کو ناکام بنایا جا سکے۔
ویسٹرن کمانڈ نے ایک بیان میں بتایا کہ لیفٹیننٹ جنرل کٹیار نے جموں، کٹھوعہ، سانبہ اور پٹھانکوٹ کے فارورڈ علاقوں میں تعینات دستوں کی تیاریوں کا جائزہ لیتے ہوئے اُن کی پیشہ ورانہ مہارت اور جدید ٹیکنالوجی کے مؤثر استعمال کی تعریف کی۔کمانڈر نے کہا کہ جوانوں کا عزم، نظم و ضبط اور اعلیٰ آپریشنل معیار بھارتی فوج کی غیر متزلزل چوکسی اور طاقت کا مظہر ہے۔
ہندوستھان سماچار
---------------
ہندوستان سماچار / محمد اصغر
