مشرقی سنگھ بھوم، 7 نومبر (ہ س) مشرقی سنگھ بھوم ضلع کے گھاٹشیلا ضمنی انتخاب میں اب سیاسی صف بندی میں ایک بڑی تبدیلی دیکھنے کو مل رہی ہے۔ آزاد سماج پارٹی (کانشی رام) نے جھارکھنڈ مکتی مورچہ (جے ایم ایم) کے امیدوار سومیش چندر سورین کی باضابطہ حمایت کا اعلان کیا ہے۔ یہ اعلان پارٹی کے قومی صدر چندر شیکھر آزاد کی ہدایات پر عمل کرتے ہوئے جھارکھنڈ کے ریاستی صدر کاشف رضا نے کیا۔

ریاستی صدر کاشف رضا نے کہا کہ پارٹی کا فیصلہ عوامی مفاد، سماجی انصاف اور مساوات کی اقدار کو مضبوط کرنے کے لیے کیا گیا ہے۔ انہوں نے ریاست بھر کے کارکنوں، عہدیداروں اور حامیوں سے اپیل کی کہ وہ متحد ہوکر جے ایم ایم کے امیدوار سومیش چندر سورین کی بھاری اکثریت سے جیت کو یقینی بنائیں۔

حمایت کے اعلان کے بعد جے ایم ایم کے امیدوار سومیش چندر سورین نے اپنے فیس بک پیج کے ذریعے آزاد سماج پارٹی کا شکریہ ادا کیا۔ انہوں نے لکھا، ”میں آزاد سماج پارٹی (کانشی رام) کی حمایت کے لیے تہہ دل سے شکریہ ادا کرتا ہوں۔ یہ تعاون عوامی بہبود، سماجی انصاف اور مساوات کی طرف ایک مضبوط قدم ہے۔ ہم ساتھ مل کر جھارکھنڈ کی ترقی، وقار اور حقوق کے تحفظ کے لیے پرعزم ہیں۔ آپ کی حمایت سے عوامی آواز کو مزید تقویت ملے گی۔“

آزاد سماج پارٹی کے اس فیصلے نے گھاٹشیلا ضمنی انتخاب کا مقابلہ اور بھی دلچسپ بنا دیا ہے۔ سیاسی تجزیہ کاروں کا خیال ہے کہ یہ اتحاد جے ایم ایم کے لیے حکمت عملی کے لحاظ سے اہم ثابت ہو سکتا ہے، خاص طور پر ان ووٹروں میں جو سماجی انصاف اور مساوات کے مسائل کو ترجیح دیتے ہیں۔

حمایت کے اعلان کے دوران پارٹی کے کئی سینئر عہدیدار موجود تھے، جن میں مشرقی سنگھ بھوم کے ضلع صدر پرویز خالد، سرائیکیلا-کھرساواں ضلع کے صدر محمد اعجاز احمد، مشرقی سنگھ بھوم کے کارگزار ضلع صدر شمیم اکرم، سرائیکیلا-کھرساواں ضلع جنرل سکریٹری محمد وسیم احمد، مشرقی سنگھ بھوم کے ضلع سکریٹری آفتاب علی، سکریٹری محمد اسمٰعیل ،شاہد شکیل،بھیم بھائی اور کپالی نگر میڈیا انچارج محمد و دیگر شامل تھے۔

ہندوستھان سماچار

ہندوستان سماچار / محمد شہزاد