سلطان پور، 6 نومبر (ہ س) ۔

رائے بریلی سے کانگریس کے رکن پارلیمنٹ اور اپوزیشن لیڈر راہل گاندھی کے خلاف ہتک عزت کیس کی سماعت جمعرات کو اتر پردیش کے سلطان پور ضلع میں ایم پی-ایم ایل اے کی عدالت میں ملتوی کردی گئی۔ کیس کی اگلی سماعت اب 17 نومبر کو ہوگی۔ راہل گاندھی کے وکیل کاشی پرساد شکلا نے کہا کہ ایک وکیل کی موت کی وجہ سے عدالت آج سوگ کی چھٹی پر ہے۔ اس لیے اب سماعت 17 نومبر کو ہوگی۔

قابل ذکر ہے کہ کوتوالی دیہات کے ہنومان گنج کے رہنے والے بی جے پی لیڈر وجے مشرا نے 2018 میں راہل گاندھی کے خلاف ہتک عزت کا مقدمہ دائر کیا تھا۔ وجے مشرا نے الزام لگایا کہ 2018 کے کرناٹک انتخابات کے دوران راہل گاندھی نے اس وقت کے بی جے پی صدر اور موجودہ مرکزی وزیر داخلہ امت شاہ کے خلاف توہین آمیز تبصرہ کیا تھا۔ راہل گاندھی کے عدالت میں پیش نہ ہونے کے بعد، اس وقت کے جج نے دسمبر 2023 میں ان کے خلاف وارنٹ جاری کیا۔ اس کے بعد راہل گاندھی نے فروری 2024 میں عدالت میں خودسپردگی کی۔ خصوصی مجسٹریٹ نے انہیں 25,000 روپے کی دو ضمانتوں پر ضمانت دی۔ 26 جولائی 2024 کو راہل گاندھی نے عدالت میں اپنا بیان ریکارڈ کراتے ہوئے اپنی بے گناہی کا دعویٰ کیا اور واقعے کو سیاسی سازش قرار دیا۔ اس کے بعد عدالت نے مدعی کو شواہد پیش کرنے کی ہدایت کی اور اس کے بعد سے گواہ مسلسل پیش ہو رہے ہیں۔ اب تک صرف ایک گواہ پر جرح ہوئی ہے جبکہ دوسرے گواہ پر جرح شروع ہو چکی ہے۔

ہندوستھان سماچار

ہندوستان سماچار / عطاءاللہ