گوالیار، 3 نومبر (ہ س)۔ مدھیہ پردیش کے گوالیار میں اتوار کی دیر رات گینگ وار چھڑ گیا۔ رنکو کماریا گینگ نے بالادستی کی لڑائی اور پانچ لاکھ روپے کے لین دین پر فائرنگ کی۔ بدمعاشوں نے کار میں سفر کرنے والے دو دوستوں کو نشانہ بنایا اور تقریباً 15 منٹ تک مسلسل فائرنگ کی۔ حملے میں دو نوجوان زخمی ہوگئے۔ فائرنگ کے بعد ملزمان اسلحہ چھینتے ہوئے موقع سے فرار ہوگئے۔ دونوں کو علاج کے لیے اسپتال میں داخل کرایا گیا ہے۔ واقعہ کے بعد سے آس پاس کے علاقے میں دہشت کا ماحول ہے۔ فی الحال، پولیس معاملے کی تحقیقات کر رہی ہے۔

اطلاعات کے مطابق، یہ واقعہ اتوار کی دیر رات گھاسمنڈی، کوٹیشور روڈ پر پیش آیا۔ شہر کے شیو نگر گھوسی پورہ جنک گنج کے رہنے والے وجے سنگھ گوڑ اپنے دوستوں بلو سردار اور حکیم سنگھ بگھیل پاٹنکر کے ساتھ کار سے گھاسمنڈی آئے تھے۔ واپسی کے دوران کوٹیشور روڈ پر بدمعاش رنکو کماریا، انی کمریا، چھوٹو کمریا، کالو کمریا اور رمیش کمریا نے انہیں گھیر لیا اور اندھا دھند فائرنگ کی۔بدمعاشوں نے 15 منٹ میں 35 سے زائد گولیاں چلائیں۔ وجے گوڑ کو تین گولیاں لگیں اور حکیم کو ایک گولی ٹانگ میں لگی۔ واقعے کی اطلاع ملتے ہی پولیس نے فوری طور پر موقع پر پہنچ کر زخمیوں کو ہزیرہ سول اسپتال میں داخل کرایا جہاں دونوں کی حالت مستحکم بتائی جاتی ہے۔ وجے سنگھ گوڑ کے والد مدھیہ پردیش پولیس میں کانسٹیبل ہیں۔

پولیس پوچھگچھ کے دوران زخمی وجے نے انکشاف کیا کہ یہ حملہ رنکو کماریا کے ساتھ پانچ لاکھ روپے کے لین دین پر ہوا ہے۔ رقم کی وصولی کے لیے بارہا کوششوں کے باوجود رنکو اسے واپس نہیں کر رہا تھا اور رقم مانگنے پر گولی مارنے کی دھمکی دے رہا تھا۔رنکو کمریا گوالیار تھانے کا ایک لسٹڈ بدمعاش ہے اور اس پرکئی مجرمانہ الزامات گولی مار، حملہ اور قتل کی کوشش کا سامنا ہے ۔ حملہ آور فی الحال لا پتہ ہیں۔ زخمیوں کی شکایت کی بنیاد پر پولیس نے تمام بدمعاشوں کے خلاف قتل کوشش کا مقدمہ درج کر کے ان کی تلاش شروع کر دی ہے۔

واقعہ کے بارے میں سی ایس پی کرشن پال سنگھ نے کہا کہ کچھ شرپسندوں نے فائرنگ کی، جس میں دو نوجوان ٹانگوں میں گولیاں لگنے سے زخمی ہو گئے۔ ان کے بیانات لیے جا رہے ہیں۔ حملہ آوروں کی تلاش جاری ہے اور انہیں جلد گرفتار کرنے کی کوششیں کی جا رہی ہیں۔

ہندوستھا ن سماچار

ہندوستان سماچار / محمد شہزاد