نئی دہلی، 23 نومبر (ہ س)۔ کرائم برانچ کے سائبر سیل نے آن لائن فاریکس ٹریڈنگ اور اسٹاک مارکیٹ میں سرمایہ کاری کی آڑ میں کام کرنے والے سائبر فراڈ ریکیٹ کا پردہ فاش کیا ہے۔ پولیس نے اس سلسلے میں دو مشتبہ افراد کو گرفتار کر لیا ہے۔ ان کی شناخت سجاد احمد (35) اور اتم منڈل (40) ساکن ستار گنج، ادھم سنگھ نگر، اتراکھنڈ کے طور پر کی گئی ہے۔

دونوں گرفتار ملزمان بیرون ملک مقیم سائبر فراڈ کرنے والوں کو خچر اکاؤنٹس (فراڈ کے لیے استعمال کیے جانے والے بینک اکاؤنٹس) فراہم کر رہے تھے۔ انہوں نے چاند الیکٹرانکس کے نام سے کرنٹ اکاؤنٹ کھولا اور اسے سائبر فراڈ کرنے والوں کو دستیاب کرایا۔ اس میں فراڈ فنڈز کی کافی مقدار جمع کرائی گئی۔ اس اطلاع کی بنیاد پر پولیس باقی ملزمان کی تلاش کر رہی ہے۔

کرائم برانچ کے ڈپٹی کمشنر آف پولیس آدتیہ گوتم نے بتایا کہ 21 فروری 2025 کو دوارکا کے ایک تاجر نے 2.35 کروڑ روپے کی دھوکہ دہی کی شکایت درج کرائی تھی۔ متاثرہ نے بتایا کہ اس نے سوشل میڈیا کے ذریعے فاریکس ٹریڈنگ اور اسٹاک مارکیٹ میں سرمایہ کاری کا اشتہار دیکھا تھا۔ اس نے سرمایہ کاری کی خواہش ظاہر کی۔ اسے اپنی سرمایہ کاری پر اچھے منافع کے وعدے کے ساتھ لالچ دیا گیا۔ بعد میں اسے کئی گروہوں میں شامل کر لیا گیا۔ آہستہ آہستہ، متاثرہ نے اسٹاک مارکیٹ میں تقریباً 2.35 کروڑ روپے کی سرمایہ کاری کی۔ اس کے بعد جب متاثرہ نے منافع واپس لینے کی کوشش کی تو رقم نہیں نکالنے دی گئی۔ بعد ازاں ملزم نے متاثرہ کو تمام گروپس سے ڈیلیٹ کر دیا۔

یہ سمجھتے ہوئے کہ اس کے ساتھ دھوکہ ہوا ہے، اس نے شکایت درج کرائی۔ پولیس نے مقدمہ درج کر کے تفتیش شروع کر دی۔ کرائم برانچ نے انسپکٹر منجیت کمار اور دیگر پر مشتمل ایک ٹیم تشکیل دی۔ ٹیم نے ان کھاتوں کی چھان بین کی جہاں فراڈ شدہ رقوم جمع کی گئی تھیں۔ تحقیقات سے معلوم ہوا کہ فراڈ شدہ رقوم تقریباً 20 مختلف کھاتوں میں منتقل کی گئیں۔

تحقیقات کے بعد پولس نے ستار گنج، ادھم سنگھ نگر پر چھاپہ مارا اور دونوں ملزمین کو گرفتار کر لیا۔ انہوں نے فراڈ میں اپنے ملوث ہونے کا اعتراف کیا۔ انہوں نے انکشاف کیا کہ وہ عام لوگوں کو اپنے نام پر بینک اکاؤنٹس کھولنے کا لالچ دیتے تھے۔ بعد میں، انہوں نے اکاؤنٹ کا انتظام ملزم سائبر فراڈ کرنے والوں کے حوالے کر دیا۔

---------------

ہندوستان سماچار / عبدالسلام صدیقی