کالمبولی میں پولیس کا چھاپہ، ساڑھے پانچ کلو گانجہ برآمد ، چار افراد گرفتار

رائے گڑھ ، 23 نومبر (ہ س) نوی ممبئی میں جاری منشیات سے پاک مہم کے دوران سنٹرل کرائم برانچ نے کالمبولی علاقے میں ایک اہم کارروائی کر کے ساڑھے پانچ کلو گانجہ ضبط کیا اور چار افراد کو گرفتار کر لیا۔ کارروائی اس وقت انجام دی گئی جب انملدار اومکار بھلیراو کو مصدقہ اطلاع ملی کہ روڈ پلی لنک روڈ پر ڈی ڈی ڈھابہ کے قریب کچھ لوگ گانجہ فروخت کرنے والے ہیں۔

اطلاع کی بنیاد پر اسسٹنٹ کمشنر اجے کمار لانڈگے کے حکم سے سینئر پولیس انسپکٹر سنیل شندے کی قیادت میں ایک خصوصی ٹیم تشکیل دی گئی۔ ٹیم میں اسسٹنٹ انسپکٹر مہیش جادھو، اسسٹنٹ سب انسپکٹر منگیش واٹ اور پولیس کانسٹیبل نتن جگتاپ، دلیپ ٹھاکر اور اومکار بھلیراو شامل تھے۔ اہلکاروں نے علاقے میں خفیہ نگرانی کے بعد ملزمان کو موقع پر ہی قابو کر لیا۔

پولیس کے مطابق گرفتار افراد کے قبضے سے ساڑھے پانچ کلو گانجہ برآمد ہوا، ساتھ ہی ایک موبائل فون اور ایک فور وہیلر بھی ضبط کیے گئے۔ ضبط شدہ گاڑی اور دیگر سامان کی مجموعی مالیت تقریباً 9 لاکھ 90 ہزار کے قریب بتائی گئی ہے، جبکہ گانجہ کی مالیت تقریباً 10 لاکھ کے آس پاس ہے۔

پولیس کمشنر ملند بھرمبے کی جانب سے جاری خصوصی ہدایات کے بعد منشیات کے خلاف کارروائیاں تیز کی گئی تھیں، جن کے نتیجے میں یہ اہم کامیابی ملی۔ ملزمان کے خلاف نارکوٹکس کنٹرول ایکٹ کے تحت مقدمہ درج کر لیا گیا ہے اور معاملے کی مزید تفتیش سنٹرل کرائم برانچ کر رہی ہے۔ پولیس کا کہنا ہے کہ اس کارروائی سے کالمبولی اور آس پاس کے علاقوں میں منشیات کی سپلائی چین کو بڑا جھٹکا لگا ہے۔

ہندوستھان سماچار

--------------------

ہندوستان سماچار / جاوید این اے