حیدرآباد ، 19 نومبر (ہ س)۔ کوٹھی سرکاری زچگی ہاسپٹل میں اس وقت سنسنی پھیل گئی جب ایک نَو ماہ کی حاملہ خاتون ہاسپٹل سے اچانک لاپتہ ہوگئی۔ رنگاریڈی ضلع کے منچال منڈل کے کاغذ گھاٹ گاؤں سے تعلق رکھنے والی 25 سالہ سوپنا اپنے شوہر شیواکمار کے ساتھ ڈیلیوری کے لیے منگل کے روز ہاسپٹل پہنچی تھی۔پولیس کے مطابق ہاسپٹل کے احاطے میں کسی بات پرسوپنا اور اس کے شوہر کے درمیان جھگڑا ہوگیا۔ بحث و تکرار کے بعد سوپنا ذہنی دباؤ کا شکار ہوکرہاسپٹل سے باہر نکل گئی اور وہاں سے ایک آٹو رکشہ میں سوار ہوکر روانہ ہوگئی۔کئی گھنٹے گزر جانے کے باوجود اس کا کوئی سراغ نہ ملنے پر گھر والوں کی پریشانی بڑھ گئی۔چونکہ سوپناکی ڈیلیوری اگلے 24 گھنٹوں میں متوقع تھی، اس کی گمشدگی نے اہلِ خانہ کوشدید تشویش میں مبتلا کردیا۔ آخرکار شوہر شیواکمار نے پولیس سے رجوع کیا اور رپورٹ درج کرائی۔سلطان بازار پولیس نے شکایت کی بنیادپر کیس درج کرتے ہوئے خاتون کی تلاش شروع کر دی ہے۔ پولیس سی سی ٹی وی فوٹیج اور عینی شاہدین کی مدد سے سوپنا کا سراغ لگانے کی کوشش کر رہی ہے۔

ہندوستھان سماچار

ہندوستان سماچار / محمدعبدالخالق