نئی دہلی، 19 نومبر (ہ س)۔ دہلی ہائی کورٹ نے 1984 کے سکھ مخالف فسادات کے دوران سرسوتی وہار کیس میں عمر قید کی سزا کو چیلنج کرنے والی سجن کمار کی درخواست پر سی بی آئی کو نوٹس جاری کیا ہے۔ جسٹس وویک چودھری کی سربراہی والی بنچ نے کیس کی اگلی سماعت 28 جنوری 2026 کو کرنے کا حکم دیا۔

راو¿س ایونیو کورٹ نے سجن کمار کو 12 فروری کو مجرم قرار دیا اور 25 فروری کو عمر قید کی سزا سنائی۔ یہ مقدمہ یکم نومبر 1984 کا ہے، جس میں مغربی دہلی کے راج نگر میں سردار جسونت سنگھ اور سردار تروندیپ سنگھ کو قتل کر دیا گیا تھا۔ تقریباً 4:30 بجے، فسادیوں کے ایک ہجوم نے راج نگر علاقے میں متاثرین کے گھر پر لوہے کی سلاخوں اور لاٹھیوں سے حملہ کیا۔ شکایت کنندگان کے مطابق، ہجوم کی قیادت سجن کمار کر رہے تھے، جو اس وقت بیرونی دہلی لوک سبھا حلقہ سے کانگریس کے رکن پارلیمنٹ تھے۔

شکایت کے مطابق سجن کمار نے ہجوم کو حملہ کرنے پر اکسایا جس کے بعد ہجوم نے سردار جسونت سنگھ اور سردار تروندیپ سنگھ کو زندہ جلا دیا۔ ہجوم نے متاثرین کے گھروں میں توڑ پھوڑ، لوٹ مار اور آگ لگا دی۔ اس وقت کے رنگناتھ مشرا کی سربراہی والے انکوائری کمیشن کے سامنے شکایت کنندہ کے ذریعہ داخل کردہ حلف نامہ کی بنیاد پر، شمالی ضلع کے سرسوتی وہار پولیس اسٹیشن میں ایف آئی آر درج کی گئی تھی۔ ایف آئی آر میں تعزیرات ہند کی دفعہ 147، 148، 149، 395، 397، 302، 307، 436، اور 440 کے تحت الزامات شامل تھے۔

ہندوستھان سماچار

ہندوستان سماچار / Mohammad Khan