حیدرآباد ، 16 نومبر (ہ س)۔شہر کے مصروف علاقے حفیظ پیٹ میں اتوار کی علی الصبح ایک بڑی آتشزدگی کے واقعے سے سنسنی پھیل گئی۔ اطلاعات کے مطابق مقامی طور پر واقع رُمان ہوٹل میں اچانک آگ بھڑک اٹھی، جس کے بعد دیکھتے ہی دیکھتے شعلے بلند ہونے لگے۔ خبر ملتے ہی فائر بریگیڈ عملہ فوری طور پر موقع واردات پر پہنچا اور دوگھنٹے کی بھرپور جدوجہد کے بعد آگ پرقابو پالیا۔

مادھا پورفائراسٹیشن کے اہلکاروں کے مطابق شارٹ سرکٹ اس حادثے کی بنیادی وجہ ہونے کا شبہ ہے۔ ان کا کہنا ہے کہ کچن میں بڑی مقدار میں تیل موجود ہونے کے باعث آگ بہت تیزی سے پھیل گئی، جس کی وجہ سے شعلوں نے پورے کچن حصے کو اپنی لپیٹ میں لے لیا۔ آگ کی شدت اتنی زیادہ تھی کہ کچن میں موجود تقریباً تمام سامان مکمل طور پر جل کرخاکستر ہوگیا۔

ہوٹل مالک کے مطابق واقعے میں بھاری مالی نقصان ہوا ہے، تاہم خوش قسمتی سے کسی جانی نقصان کی اطلاع نہیں ہے۔ فائر حکام اور مقامی پولیس آگ لگنے کی صحیح وجوہات اور نقصان کے تخمینے کے سلسلے میں مزید تفتیش کر رہے ہیں۔۔ہندوستھان سماچار

ہندوستان سماچار / محمدعبدالخالق