بھوپال، 9 اکتوبر (ہ س)۔ مدھیہ پردیش میں موسلادھار بارش کا دورانیہ اب ختم ہو گیا ہے۔ اگرچہ کچھ اضلاع میں اب بھی ہلکی بوندا باندی ہو رہی ہے، لیکن آنے والے دنوں میں ریاست میں دن میں تیز دھوپ کھلے گی اور رات کو گلابی سردی کا احساس ہوگا۔ محکمہ موسمیات کا اندازہ ہے کہ دو سے تین دن میں پوری ریاست سے مانسون روانہ ہو جائے گا۔ مشرقی علاقوں میں تین روز تک بوندا باندی کا امکان ہے۔ گزشتہ بدھ کو ریاست میں کہیں بھی بارش نہیں ہوئی۔

محکمہ موسمیات کے مطابق مانسون ریاست کے 12 اضلاع یعنی گوالیار، شیوپور، مرینا، بھنڈ، دتیا، شیو پوری، گنا، آگر مالوا، نیمچ، مندسور اور رتلام سے مکمل طور پر وداع ہو چکا ہے، جب کہ راج گڑھ اور اشوک نگر کے کچھ حصوں سے روانہ ہوچکا ہے۔ فی الحال ریاست میں بارش کا کوئی فعال نظام نہیں ہے۔ ان وجوہات کی وجہ سے پوری ریاست سے مانسون کی واپسی کے لیے حالات سازگار ہو گئے ہیں۔ ماہرین موسمیات کا کہنا ہے کہ آئندہ 3 روز تک دھوپ، چھاوں اور بوندا باندی کا امکان ہے۔ مشرقی اضلاع میں چند مقامات پر بوندا باندی ہو سکتی ہے۔ وہیں بھوپال، اندور، اجین اور گوالیار میں دن میں تیز دھوپ کھلے گی۔

ریاست میں درجہ حرارت کی بات کریں تو کئی شہروں میں رات کا درجہ حرارت 18 ڈگری سیلسیس تک پہنچ گیا ہے، جب کہ دن کا درجہ حرارت 24 ڈگری کے آس پاس ہے۔ راجدھانی بھوپال میں رات کا درجہ حرارت 19.6 ڈگری سیلسیس، اجین میں 19 ڈگری، گوالیار میں 22.1 ڈگری اور جبل پور میں 21 ڈگری سیلسیس ریکارڈ کیا گیا۔ اس مانسون کے موسم میں گنا میں سب سے زیادہ بارش ہوئی ہے۔ شاجاپور، کھرگون، کھنڈوا، بڑوانی اور دھار میں سب سے کم بارش ریکارڈ کی گئی ہے۔

ہندوستھان سماچار

---------------

ہندوستان سماچار / انظر حسن