جموں, 9 اکتوبر (ہ س)جموں و کشمیر کے ضلع پونچھ میں لائن آف کنٹرول (ایل او سی) کے نزدیک جمعرات کی صبح زوردار دھماکوں کی آوازوں سے علاقہ دہل اٹھا، جب ایک شیل اور چار بارودی سرنگیں پھٹ گئیں۔ خوش قسمتی سے ان واقعات میں کسی قسم کا جانی نقصان نہیں ہوا۔

سرکاری ذرائع کے مطابق منکوٹ کے سگرا گاؤں میں ایک زمین کھودنے والی مشین کام کر رہی تھی کہ اچانک زیرِ زمین دبایا گیا ایک مورٹار شیل پھٹ گیا۔ دھماکہ اتنا شدید تھا کہ اردگرد کا علاقہ لرز اٹھا، تاہم مشین کا آپریٹر معجزانہ طور پر محفوظ رہا۔ اطلاع ملتے ہی پولیس اور سیکورٹی فورسز کی ٹیمیں موقع پر پہنچ گئیں اور علاقے کو گھیرے میں لے کر تحقیقات شروع کر دی گئیں۔ ابتدائی جانچ میں معلوم ہوا ہے کہ یہ مورٹار شیل غالباً ماضی میں سرحد پار سے کی گئی گولہ باری کے دوران پھٹنے سے رہ گیا تھا۔

اسی دوران بدھ کے روز بالاکوٹ سیکٹر میں بھی چار بارودی سرنگوں میں دھماکے ہوئے۔ حکام کے مطابق حالیہ بارشوں کے باعث یہ سرنگیں انسدادِ دراندازی رکاوٹی نظام سے اپنی جگہ سے ہٹ گئی تھیں۔ بعد ازاں بم ڈسپوزل اسکواڈ نے انہیں محفوظ طریقے سے دھماکے سے تباہ کر دیا۔پولیس کے مطابق دونوں واقعات میں کسی جانی یا مالی نقصان کی اطلاع نہیں ہے، تاہم احتیاطی طور پر پورے علاقے میں سیکورٹی فورسز نے سرچ آپریشن تیز کر دیا ہے تاکہ کسی اور خطرے کے امکان کو ختم کیا جا سکے۔

ہندوستھان سماچار

ہندوستان سماچار / محمد اصغر